कपिलवस्तु र पर्सामा स्रोत नखुलेको भारतीय रूपैयाँसहित २ जना पक्राउ

काठमाडौं । कपिलवस्तु र पर्सामा स्रोत नखुलेको भारतीय रूपैयाँसहित दुईजना पक्राउ परेका छन् । कपिलवस्तुको कृष्णनगर नगरपालिका-२, लिङगेटबाट स्रोत नखुलेको चार लाख ५० हजार भारतीय रूपैयाँसहित पाल्पा घर भई भारत लखनउमा बस्दै आएकी ४० वर्षीया राधा सारुलाई सोमबार दिउँसो प्रहरीले पक्राउ गरेको छ ।

अस्थायी प्रहरी पोष्ट लिङगेटबाट खटिएको प्रहरीले जाँच गर्ने क्रममा पैदलयात्री राधालाई उक्त भारतीय रूपैयाँसहित फेला पारी पक्राउ गरेको हो । उनलाई थप अनुसन्धानको लागि रकमसहित राजश्व कार्यालय बुटवल पठाइएको छ । त्यस्तै, पर्साको वीरगंज महानगरपालिका–१६ रजत जयन्ती चोकबाट स्रोत नखुलेको एक लाख ७३ हजार ९०० भारतीय रूपैयाँसहित बारा कलैया उपमहानगरपालिका–१८ मोतिसर टोल बस्ने ५४ वर्षीय मेहीलाल प्रसाद साहलाई सोमबार दिउँसो प्रहरीले पक्राउ गरेको छ ।

प्रहरी चौकी इनार्वावाट खटिएको टोलीले भारत रक्सौलबाट वीरगंज बजारतर्फ आउँदै गरेको ना.२ प १११३ नम्बरको मोटरसाइकललाई जाँच गर्ने क्रममा चालक साहलाई उक्त भारतीय रूपैयाँसहित फेला पारी पक्राउ गरेको हो ।