नेपाल दूरसञ्चार प्राधिकरण मकवानपुरको सेवा प्रदायकहरु र सरोकारवालाबीच छलफल सम्पन्न

हेटौंडा । नेपाल दूरसञ्चार प्राधिकरण मकवानपुर, हेटौंडाको आयोजनामा शनिबार हेटौंडामा दूरसञ्चारसँग सम्बन्धित कानुन र समग्र दूरसञ्चार सेवाको वर्तमान अवस्थाबारे सेवा प्रदायकहरु र सरोकारवालाबीच छलफल तथा अन्तरक्रिया कार्यक्रम भएको छ ।

प्राधिकरणका उपनिर्देशक रेवतीराम पन्तको सभाध्यक्ष तथा बागमती प्रदेश सरकार आन्तरिक मामिला तथा कानुन मन्त्री गंगानारायण श्रेष्ठको प्रमुख आतिथ्यमा कार्यक्रम भएको हो ।

मन्त्री श्रेष्ठले सञ्चार मानवअधिकार भित्र परिभाषित गरेको अवस्थामा सुचना प्रबिधिको विकास गरी जनताको पहुँचमा पुर्‍याउन सरकारले गम्भीरतापूर्वक लागिरहेको बताउनुभयो ।

२१ औं शताब्दीमा सञ्चार सेवाबाट जनता विमुख भएका छन् । जसले गर्दा २०८०/२०८१ भित्र प्रदेशलाई प्रबिधिमैत्री बनाउन चाहिने आधार निर्माण गर्दै जाने प्रतिबद्धता जनाउनुभयो । सञ्चार र प्रबिधि लगायतलाई विकास गर्ने आधार कानुन निर्माण गर्दै जाने उहाँको प्रतिबद्धता छ ।

यस्तै उपनिर्देशक पन्तले दूरसञ्चार ऐन २०५३, प्राधिकरणको काम, कर्तव्य, गुणस्तर निर्धारण र सेवाको स्तर तोक्ने, निरीक्षण जाँचबुझ, चुनौती, समस्या र समाधानबारे सहजीकरण गर्नुभयो । कार्यक्रम अशिष मिडिया नेटवर्कको व्यवस्थापनमा भएको कार्यक्रममा जिल्ला वार एशोसिएसनको अध्यक्ष अप्सरा बस्नेतको आतिथ्य रहेको थियो ।