हेटौंडामा रातारात हटाईयो राप्तिरोडको सडकपेटीमा राखेको रुख–विरुवाहरू

हेटौंडा । हेटौंडा उपमहानगरपालिकाले राप्तिरोडको दायाँ–बायाँ सडकपेटीमा राखेको रुख–विरुवाहरू रातारात हटाएको छ ।

पूर्व–पश्चिम राजमार्ग विस्तारका लागि सूचना प्रकाशित भइसकेको अवस्थामा उपमहानगरपालिकाले सडक विस्तारमा सहजता प्रदान गर्न रुख–विरुवा हटाएको नगरप्रहरी प्रमुख नेत्रप्रसाद ढकालले बताए ।

उपमहानगरपालिकाले बुधबार राति दुईवटा जेसिवी प्रयोग गरेर सडकपेटीमा राखिएका गमलासहितका विरुवा हटाएको हो ।

सडक डिभिजन कार्यालय हेटौँडाले १० असारमा ३५ दिने सूचना निकालेर पूर्वपश्चिम राजमार्गको दायाँबायाँ २५ गजभित्र पर्ने सम्पूर्ण घरटहरा हटाउन आग्रह गरेको थियो ।२५ गज क्षेत्रमा पर्ने भएपछि हेटौँडा– १ र १० तर्फको राप्तिरोडको सडकपेटीबाट विरुवा हटाइएको उपमहानगरपालिकाले जनाएको छ । यसअघि उपमहानगरपालिकाको १३औँ नगरपरिषद् बैठकले उक्त सुचनाको स्वागत गर्दै सडक फराकिलो पार्ने कार्यमा सहजिकरण र समन्वय गर्ने निर्णय गरेको थियो ।