रौतहट ट्राफिक प्रहरीध्दारा ३ करोडभन्दा बढी राजस्व संकलन

रौतहट । रौतहट ट्राफिक प्रहरीले आर्थिक वर्ष २०७९/८० मा नियमविपरीत सञ्चालित सवारीसाधनलाई कारबाही गरी ३ करोडभन्दा बढी राजस्व संकलन गरेको छ । ट्राफिक प्रहरीले नियमविपरीत चलेका ३८ हजार ५८२ सवारीसाधनलाई कारबाही गरी ३ करोड १० लाख ४ हजार रुपैयाँ राजस्व संकलन गरेको हो ।

जिल्ला ट्राफिक प्रहरी कार्यालयका अनुसार गत आर्थिक वर्षमा अघिल्लो आर्थिक वर्षको तुलनामा ट्राफिक राजस्व ६८ प्रतिशतले बढेको छ । गत आर्थिक वर्षमा सबैभन्दा बढी मोटरसाइकल कारबाहीमा परेको रौतहट ट्राफिक प्रहरीले बताएको छ ।

आर्थिक वर्ष २०७९/८० मा जिल्लाभर ६४५ सवारी दुर्घटनामा परेर १ हजार ४७ जना घाइते भएका थिए भने ५० जनाको मृत्यु भएको जिल्ला ट्राफिक प्रहरी कार्यालय रौतहटका प्रमुख विमलाकुमारी कठायतले बताइन् । उनका अनुसार अघिल्लो आर्थिक वर्षमा जिल्लाभर ७१३ सवारी दुर्घटना हुँदा १ हजार १७१ जना घाइते भएका थिए भने ७२ जनाको मृत्यु भएको थियो । जिल्ला ट्राफिक प्रहरी कार्यालय रौतहटले नियम विपरीत सञ्चालित सवारीसाधनलाई कारबाही गरी राजस्व संकलन गर्दै आएको छ ।