ललितपुरको टिकाथलीमा व्यवस्थित ‘ भाजु तरकारी तथा फलफूल बजार ’ शुरु हुँदै, साउन महिनाको स्टल तथा सटरको भाडा निस्शुल्क गरिने

ललितपुर । ललितपुरको महालक्ष्मी नगरपालिका -५, टिकाथली ( बुद्ध पार्टी प्यालेस सँगै-मा २ रोपनी ( ३० आना ) क्षेत्रफलमा व्यवस्थि ‘ भाजु तरकारी तथा फलफूल बजार शुरु ’ हुने भएको छ। महालक्ष्मी नगरपालिकाकै पहिलो र एकमात्रै व्यवस्थित तरकारी बजारमा ७० वटा स्टल तथा सटर रहने छन् ।

उक्त तरकारी बजारमा आफ्नो गाउँ र घरको ताजा – ताजा तरकारी तथा फलफूल ल्याउने अनि सस्तो मूल्यमा बिक्री गराउने संचालक आदिल महर्जनले दाबी गरेका छन। ‘सस्तोमा उपभोक्ताहरुलाई सहजै ताजा तरकारी उपलब्ध गराउन, कृषकहरुको मेहनतअनुसार मूल्य दिन, कृषक र उपभोक्ताबीच सिधा सम्पर्क स्थापना गरी बिचौलियाहरुलाई निषेध गर्न तरकारी बजार खोलिएको हो’, संचालक महर्जनले भने।

उक्त तरकारी तथा फलफूल बजारमा मौसमी र बेमौसमी तरकारी, फलफूल, दुर्गम गाँउमा उत्पादन हुने गुन्द्रुक, पिठोको स्टलदेखि, जिउँदो माछा र सहकारी संस्था पनि हुने बताइएको छ। उक्त तरकारी बजारमा आउने उपभोक्ताहरुलाई प्रयाप्त पार्किङको व्यवस्था समेत गरिएको छ। उक्त तरकारी तथा फलफूल बजारमा साउन महिनाको स्टल तथा सटरको भाडा निस्शुल्क गरिएको संचालक महर्जनले जानकारी दिएका छन । साउन ११ गते, बिहीबार, बिहान ०७:०० बजे, महालक्ष्मी नगरपालिकाका नगर प्रमुख हरिगोविन्द श्रेष्ठको प्रमुख आतिथ्यता र नगर उप – प्रमुख लक्ष्मी महर्जनको विशेष आतिथ्यतामा उक्त बजारको उद्घाटन गरिने भएको छ ।