चिर्पट प्रहार गरी आफ्नै श्रीमतीको हत्या

काभ्रे । काभ्रेको पाँचखाल नगरपालिका–१२ एक व्यक्तिले चिर्पट प्रहार गरी आफ्नै श्रीमतीको हत्या गरेका छन् ।

स्थानीय देवीराज भेटवालको घरमा डेरा गरी बस्ने ३६ वर्षीय हरी माझीले २६ वर्षीया श्रीमती कुमारी माझीलाई टाउकोमा चिर्पट प्रहार गरी हत्या गरेको प्रहरीले जनाएको छ ।

प्रहरीका अनुसार, कुमारीको धुलिखेल अस्पतालमा उपचारको क्रममा आज बिहान २ बजेर ११ मिनेटमा मृत्यु भएको थियो ।

श्रीमतीको हत्यामा संलग्न हरी माझीलाई बालुवा प्रहरीले पक्राउ गरेको छ । उनले श्रीमतीलाई चिर्पट प्रहार गर्नुको कारण नखुलेको र घटनाबारे अनुसन्धान भइरहेको प्रहरीले जनाएको छ ।