महिलाको मृत्यु भएपछि शव मेडिकल पसल अगाडि राखेर स्थानीयहरुले गरे प्रदर्शन

मोरङ । मोरङको लेटाङ तनावग्रस्त बनेको छ। एक जना महिलाको मृत्यु भएपछि उनको शव मेडिकल पसल अगाडि राखेर स्थानीयहरुले प्रदर्शन गरेका छन्।

लेटाङ नगरपालिका–४ की ३० वर्षीया विना भनिने विनिता तामाङको मृत्यु भएपछि आफन्त र स्थानीय विरोध प्रदर्शनमा उत्रेपछि लेटाङ बजार क्षेत्रमा तनाव बढेको हो।

मंगलबार दिउँसो २ बजेदेखि सोही ठाउँको जनप्रिय मेडिकल अगाडि शव राखेर परिवारका सदस्य र स्थानीय विरोधमा उत्रेपछि अवस्था असामान्य भएको मोरङ प्रहरीले जनाएको छ।

तामाङ बिरामी परेपछि उपचारका लागि भदौ २२ गते शुक्रबार लेटाङ–४ कै जनप्रिय मेडिकलमा पुगेकी थिइन्। मेडिकलमा सामान्य उपचारपछि औषधि लिएर पुनः तामाङ घर फर्किन्। तामाङ स्वास्थ्य अवस्था सुधार नआई झन् बिगिँदै गएपछि सोमबार दिउँसो ११ बजेतिर पुनः मेडिकलमा परिवारले लगेका थिए।

दिउँसो मेडिकल पुगेका उनीहरुलाई मेडिकलले उनको अवस्था खराब रहेको र थप उपचारका लागि सुविधा सम्पन्न अस्पताल लैजान भनेर रेफर गरिदियो। मोरङ प्रहरीका प्रवक्ता डिएसपी रञ्जनकुमार दाहालका अनुसार मेडिकल सोमबार रेफर गरेपछि सोही दिन विराटनगरस्थित विराट नर्सिङ होममा उपचारका लागि भर्ना भएकी थिइन्।

उपचारकै क्रममा मंगलबार बिहान ६ बजेतिर तामाङको मृत्यु भएको बताउँदै, डिएसपी दाहालले भने, ‘शुक्रबार जनप्रिय मेडिकलमा गएर औषधि लिएको र स्वास्थ्यमा सुधार नआएपछि पुनः सोमबार मेडिकल पुगेकी उनलाई थप सुविधा सम्पन्न अस्पताल रेफर गरेपछि विराटनगर ल्याइएको थियो। उनका परिवार र आफन्तले शव लगेर मेडिकल अगाडि राखेर प्रदर्शनमा उत्रेपछि लेटाङको अवस्था असामान्य बनेको हो।’

उनीहरुले मेडिकल सञ्चालकलाई कारबाही गर्नुपर्ने लगायतका माग राख्दै प्रदर्शन गर्दै आएका छन्। परिवारका सदस्य र आफन्तहरु प्रदर्शनमा उत्रेपछिको भीडले मेडिकल पसल तोडफोड गर्ने प्रयास गरेपछि सुरक्षा व्यवस्था कडाइ गरेको बताउँदै, डिएसपी दाहालले भने, ‘समयमै रोग पत्ता नलगाएको र उपचारका नाममा अल्झाएका कारण मृत्यु भएको हुँदा कडा कारबाही हुनुपर्ने माग राखेका छन्। पीडितका आफन्त, मेडिकल सञ्चालक, जनप्रतिनिधि, स्थानीय र प्रहरी बसेर वार्ता भइरहेको छ।’

स्थितिलाई नियन्त्रणमा लिन र अवस्था थप तनावग्रस्त हुन नदिन पथरी, बेलबारी र विराटनगरबाट ठूलो संख्यामा प्रहरी परिचालन गरिएको छ।