दोलखामा ढुङ्गामाथि झारले छोपेको अवस्थामा थप ४ केजी सुन भेटियो

हेटौंडा । दोलखा जिल्लामा ढुङ्गामाथि झारले छोपेर राखेको अवस्थामा थप ४ केजी सुन भेटिएको छ ।  आइतबार थप ४ केजी सुन फेला परेको दोलखा जिल्ला प्रहरी कार्यालयले जनाएको छ ।

जिल्लाको विगु गाउँपालिका- १ लामाबगर निवासी अन्दाजी २७ वर्षीय अशोक मगरको घर आसपासमा उक्त सुन फेला परेको छ ।  सुन तस्कर आरोपमा फरार रहेका मगरको घर आसपास रहेको ठुलो ढुङ्गामाथि झारले छोपेर राखेको अवस्थामा प्रहरीले उक्त सुन बरामद गरिएको छ । यो सँगै हालसम्म जिल्लामा प्रहरीले ११ केजी अवैध रुपमा भित्रिएको सुन बरामद गरेको छ ।

दोलखा प्रहरीले विशेष सुचनामा आधारमा गत बुधबार राति ४ किलो सुन बरामद गरे लगतै शुक्रबार दिउँसो पनि ३ किलो सुन बरामद गरेको थियो । फलाकबाट चीनको रोङजिया नाकाबाट ठूलो परिमाणमा सुन पैदलमार्गबाट भित्रिएको अनुमानका आधारमा प्रहरीले उक्त क्षेत्रमा निगरानी बढाएको थियो।

उत्तरी चिनियाँ नाकाबाट अवैध रुपमा भित्रिएको भनिएको घटनामा संलग्न ७ जनालाई अहिले पक्राउ गरेर जिल्ला प्रहरी कार्यालय दोलखाले अनुसन्धान गरीरहेको छ । पक्राउ परेका सातै जना एउटै गाउँका रहेको पाइएको छ।