राजनीति स्वार्थ केन्द्रित विद्यार्थी संगठनमा हाबी

त्रिभुवन विश्वविद्यालय अन्तर्गतका केही आंगिक क्याम्पसहरूमा चैत ५ गते स्ववियु निर्वाचन हुन सकेन । उपत्यकाका ७ वटा क्याम्पसमा चुनाव हुन नसकेको हो । त्यस्तै उपत्यकाका बाहिरका ९ वटा आंगिक क्याम्पसमा पनि चुनाव हुन सकेको छैन । तालाबन्दीका कारण ती क्याम्पसहरूमा निर्वाचन हुन नसकेको हो । निर्वाचन हुन नसकेका उपत्यकाका आंगिक क्याम्पसहरूमा आयुर्वेद क्याम्पस, त्रिचन्द्र क्याम्पस, पाटन संयुक्त क्याम्पस, अमृत साइन्स क्याम्पस, नेपाल कमर्स क्याम्पस मीनभवन, विश्व भाषा क्याम्पस र रत्न राज्यलक्ष्मी (आरआर) क्याम्पस रहेका छन् ।

त्यस्तै उपत्यका बाहिर डोटीको डोटी क्याम्पस, पोखराको पृथ्वीनारायण क्याम्पस, पोखरा क्याम्पस (वन), पश्चिमाञ्चल इन्जिनियरिङ क्याम्पस, नर्सिङ क्याम्पस, चितवनको वीरेन्द्र क्याम्पस, चितवन इन्जिनियरिङ क्याम्पस रामपुर, कृषि क्याम्पस रामपुर खैरानी र बागलुङको धवलागिरि क्याम्पसमा निर्वाचन हुन बाँकी रहेको छ । तीमध्ये पोखराको पोखरा बन क्याम्पसमा चैत १२ गते, कीर्तिपुरमा रहेको आयुर्वेद क्याम्पस र कृषि क्याम्पस चितवनमा चैत १७ गते र धवलागिरि बहुमुखी क्याम्पस बागलुङमा चैत १८ गते निर्वाचन हुनेछ ।

ती क्याम्पसहरूमा निर्वाचनको प्रक्रिया समेत अगाडि बढिसकेको छ । तीबाहेक पोखराको पृथ्वीनारायण क्याम्पस र नर्सिङ क्याम्पस क्याम्पसमा अदालतका कारण अनिश्चित बनेको छ । ती दुवै क्याम्पसहरूमा उच्च अदालतले तत्काल निर्वाचन प्रक्रिया स्थगित गर्न अन्तरिम आदेश जारी गरेको छ । यस अदालतको फैसला नहुँदासम्म निर्वाचन प्रक्रिया अगाडि बढ्ने सक्ने अवस्था छैन ।

ठाकुरराम बहुमुखी क्याम्पस, रामपुर कृषि क्याम्पस, धौलागिरि बहुमुखी क्याम्पस, डोटी बहुमुखी क्याम्पस, सिद्धनाथ विज्ञान क्याम्पस, पाटन संयुक्त क्याम्पस, विश्व भाषा क्याम्पस र पश्चिमाञ्चल इन्जिनियरिङ क्याम्पसमा नेविसंघले ताला लगाएको छ । त्यस्तै वीरेन्द्र बहुमुखी क्याम्पस, चितवन इन्जिनियरिङ क्याम्पस र अमृत साइन्स क्याम्पसमा अखिल (क्रान्तिकारी) ले ताला लगाएको छ । त्यस्तै त्रिचन्द्र क्याम्पसमा अनेरास्ववियुले र आरआरमा अनेरास्ववियूले ताला लगाएको छ ।

नेपाल कमर्स क्याम्पस मीनभवनमा क्याम्पस प्रशासनको कारण निर्वाचन रोकिएको छ । क्याम्पस प्रशासनले निर्वाचन प्रक्रिया नै अगाडि बढाउन सकेको छैन । त्रिवि विद्यार्थी कल्याण तथा खेलकुद निर्देशनालयका निर्देशक प्राध्यापक पशुपति अधिकारीले तीन वटा विद्यार्थी संगठनका अध्यक्षले सहमति गरियो भनेर एक विज्ञप्ति निकाल्ने विक्तिकै निर्वाचन हुने बताए । ‘नेविसंघ, अनेरास्ववियु र अखिल क्रान्तिकारी विद्यार्थी संगठनका अध्यक्षहरूले एक विज्ञप्ति मात्र निकालिदिने हो भने भोलि नै निर्वाचन हुन्छ । अनेक माग राखेर तालाबन्दी गर्ने अनि निर्वाचन भएन भनेर हिँड्न पाइन्छ ?’ उनले प्रश्न गरे ।

उपत्यका बाहिरका क्याम्पसहरूमा त्यति धेरै समस्या देखिएको छैन । विद्यार्थी संगठनहरूले उपत्यकाभित्रका क्याम्पसलाई आफ्नो प्रतिष्ठाको विषय बनाएका छन् । जसले गर्दा अनावश्यक मागहरू राखेर विद्यार्थी संगठनहरूले तालाबन्दी गरेका हुन् । उनीहरूको माग भनेको फर्जी विद्यार्थी भर्ना गरिएको, कुनै एक संगठनको पक्षपोषण हुने गरी निर्वाचन अधिकृतले काम गरेको जस्तो आरोप लगाउँदै त्यसमा कारबाही हुनुपर्ने भन्ने छ । तर, भित्री कुरा हेर्दा सम्बन्धित क्याम्पसमा आफ्नो जनधार कमजोर देखिएपछि उनीहरूले निर्वाचन नहोस् भन्नका लागि तालाबन्दी गरेको देखिन्छ । त्यो कलेजमा अर्को विद्यार्थी संगठनले जित्ने आधार देखिएपछि वा अर्को संगठनको राम्रो जनधार देखिएपछि कमजोर जनधार देखिएको संगठनले तालाबन्दी गरेको देखिन्छ ।