मोटरसाइकल दुर्घटनामा परि चालकको मृत्यु

कैलाली। कैलालीको लम्की चुहामा भएको मोटरसाइकल दुर्घटनामा परी एक जनाको मृत्यु भएको छ। पूर्वपश्चिम राजमार्ग अन्तर्गत लम्की बहुमुखी क्याम्पस नजिकै भएको उक्त दुर्घटनामा लम्कीचुहा-२ का ६५ वर्षीय लक्षीराम रिमालको ज्यान गएको जिल्ला प्रहरी कार्यालय कैलालीले जनाएको छ।

जिल्ला ट्राफिक प्रहरी कार्यालय कैलालीका अनुसार, रिमालले चलाइरहेको से७प ३२३२ नम्बरको मोटरसाइकल अनियन्त्रित भई सडक किनारमा रोकिराखेको से१त ९६२३ नम्बरको ट्याक्टरको ट्रलीसँग ठोक्किएको थियो।

दुर्घटनामा गम्भीर घाइते भएका रिमाललाई तत्कालै उपचारका लागि लम्कीस्थित लालरत्न अस्पताल पुर्‍याइएको थियो। तर, उपचारकै क्रममा राति सवा ९ बजे उनको निधन भएको कुरा प्रहरीले जानकारी गराएको छ।