​ललितपुरमा ‘सबल विश्व दृष्टिकोण’ तालिम सम्पन्न: सहिष्णुता र सद्भाव अभिवृद्धिमा जोड दिने उद्देश्य

​ललितपुर। विश्वदृष्टिकोण र आपसी सहिष्णुता बढाउने उद्देश्यका साथ ललितपुरको पुलचोकस्थित सांग्रिला ब्लु होटलमा आयोजना गरिएको ‘सबल विश्व दृष्टिकोण’ तालिम सफलतापूर्वक सम्पन्न भएको छ। साउन २५ गतेदेखि सुरु भएको चार दिने प्रशिक्षण कार्यक्रम साउन २८ गते सम्पन्न भएको हो। निरन नेपाल, असल छिमेकी नेपाल, र वर्ल्ड भिजनको सहकार्यमा तालिम सञ्चालन गरिएको थियो।

​’प्रशिक्षक प्रशिक्षण’ मूल नाराका साथ सञ्चालित यस कार्यक्रमको मुख्य उद्देश्य समाजमा व्याप्त विकृति र कुरीति हटाउँदै विभिन्न धर्म समुदायका मानिसहरूबीच सद्भाव र सहिष्णुता कायम गर्नु रहेको छ। हाल यो कार्यक्रम बालाजु र कीर्तिपुर नगरपालिकामा केन्द्रित भएर सञ्चालन गरिएको छ।

तालिममा विभिन्न अपाङ्गता भएका व्यक्ति, धर्मगुरु तथा विभिन्न धर्मका अनुयायीहरूको सक्रिय सहभागिता रहेको थियो। साउन २५ गते निरन नेपालका प्रतिनिधि इशुजङ कार्कीको कार्यक्रमको महत्त्वबारे प्रकाश पारिएको स्वागत मन्तव्य पश्चात कार्यक्रम अगाडि बढेको थियो। यसैगरी, वर्ल्ड भिजनका प्रतिनिधि तेजेन्द्र मगरले समेत समाजका कुरीतिहरू हटाउन सबल विश्व दृष्टिकोणको आवश्यकता रहेको कुरा प्रस्ट्याउँदै मन्तव्य राख्नुभएको थियो।

​तालिममा ‘म हुनुको औचित्य’, दया र करुणा, सकारात्मक सोच, र स्थानीय स्रोतसाधनको प्रयोगजस्ता महत्त्वपूर्ण विषयमा छलफल भएको थियो। यसै क्रममा कार्यक्रममा सहभागी हिन्दु, बौद्ध, ईसाई, इस्लाम, जैन, बहाइ लगायत धर्मका धर्मगुरुहरूले ‘ईश्वर एउटै हुन्, मान्ने तरिका मात्र फरक हो’ भन्ने सन्देश दिई सबैलाई प्रेरित गरेका थिए। कार्यक्रमको पहिलो तीन दिन दकिला स्याङतान, तिलक चाम्लिङ, डा. नम्रता पाण्डे लगायतका प्रशिक्षकहरूले प्रशिक्षण दिनुभएको थियो।

​अन्तिम दिन, तालिममा सहभागी १८ जना प्रशिक्षार्थीले आफैँ प्रशिक्षण दिने अवसर पाएका थिए। उनीहरूलाई प्रमाणपत्र वितरण गर्दै निरन नेपालका अध्यक्ष भेनेरेबल पिया दसी महर्जनले कार्यक्रमको समापन गर्नुभएको थियो। कार्यक्रमको सञ्चालन तथा सहजीकरण भने निरन नेपालकी कार्यक्रम संयोजक शेख नहिँदा बानोले गर्नुभएको थियो।