मकवानपुरमा नेपाल राष्ट्रिय शिक्षक संगठनद्वारा तीज विशेष कार्यक्रम सम्पन्न, ७ महिला प्रधानाध्यापक सम्मानित

हेटौंडा, साउन ३०। नेपाल राष्ट्रिय शिक्षक संगठन जिल्ला महिला विभाग मकवानपुरको आयोजनामा हेटौंडा–२ स्थित कालिका पार्टी प्यालेसमा एक भव्य तीज विशेष कार्यक्रम, जिल्ला महिला भेला तथा खुला हाजिरजवाफ प्रतियोगिता सम्पन्न भएको छ। करिब ५०० जना व्यक्तिहरु सहभागी भएको उक्त कार्यक्रममा मकवानपुर जिल्लाका विभिन्न माध्यमिक विद्यालयमा कार्यरत महिला प्रधानाध्यापकहरूलाई उत्कृष्ट कार्य प्रदर्शनको मूल्याङ्कन गर्दै सम्मानसहित प्रमाणपत्र प्रदान गरिएको थियो।

कार्यक्रमको उद्घाटन राष्ट्रिय गान र शहीदहरू प्रति श्रद्धाञ्जली स्वरूप मौन धारणबाट गरिएको थियो। प्रमुख अतिथिका रूपमा उपस्थित नेपाल राष्ट्रिय शिक्षक संगठन राष्ट्रिय समितिका उपसचिव श्रीराम दाहालले पानसमा दीप प्रज्वलन गरी कार्यक्रमको औपचारिक शुभारम्भ गरेका थिए।

कार्यक्रममा कोषाध्यक्ष श्रीमती भावना सापकोटाले स्वागत मन्तव्य दिएकी थिइन् भने सञ्चालनको जिम्मेवारी सचिव सविता लामिछानेले सम्हालेकी थिइन्। कार्यक्रमको सभाध्यक्ष संयोजक चन्द्रादेवी लामा बल रहेका थिए।

कार्यक्रममा तीज पर्वको सांस्कृतिक महत्व झल्काउने मौलिक गीत–संगीत तथा मनोरञ्जनात्मक प्रस्तुतिहरू सहित बौद्धिक विकासमा योगदान पुर्याउने उद्देश्यले हाजिरजवाफ प्रतियोगिता समेत आयोजना गरिएको थियो।

उक्त कार्यक्रममा सम्मानित महिला प्रधानाध्यापकहरू:

१) उषा आचार्य – श्री महालक्ष्मी मावि, मकवानपुर–५

२) उमा तामाङ – कालिका मावि, इन्द्रसरोवर–४

३) सपना लामा – श्री पशुपतिनाथ मावि, मनहरी–४

४) कविता थिङ – श्री महेन्द्र किरण मावि, मनहरी–६

५) लालुमाया प्रजा – श्री राष्ट्रिय मावि, राक्सिराङ–६

६) शर्मिला पौडेल – श्री प्रजा जागृति मावि, राक्सिराङ–१

६) मालती उप्रेती – श्री अमर मावि, हेटौंडा–१

कार्यक्रममा नेपाल राष्ट्रिय शिक्षक संगठनका राष्ट्रिय समिति सदस्य निलिमा गोङवा, लेखा आयोग सदस्य नवराज अर्याल, विभिन्न विद्यालयका प्रिन्सिपल, निवृत्त शिक्षक, पत्रकार, तथा संगठनका पदाधिकारीहरूको उल्लेखनीय उपस्थिति रहेको थियो।

कार्यक्रमको समापन तीज विशेष दर भोज र सांस्कृतिक मनोरञ्जनात्मक कार्यक्रममार्फत गरिएको थियो।