प्रतिबद्धता बिना भोट हुँदैन : मकवानपुरमा सचेत मतदाता निर्माणका लागि जनजागरण अभियान घोषणा

हेटौँडा, पुस २८ गते । व्यापक भ्रष्टाचार, अनियमितता र जिम्मेवारीविहीन नेतृत्वका कारण जनजीवन झनै दयनीय बन्दै गएको तितो यथार्थलाई ध्यानमा राख्दै सेवा, सहयोग र आवाज संस्थाले मकवानपुरभरि सचेत मतदाता निर्माणका लागि जनजागरण अभियान सञ्चालन गर्ने निर्णय गरेको छ।

संस्थाका अध्यक्ष तथा सामाजिक अभियन्ता विशाल राज महतले सामाजिक सञ्जालमार्फत सार्वजनिक गरेको धारणा अनुसार अब मकवानपुरवासीले झुटा आश्वासन र आकर्षक नाराभन्दा माथि उठेर तथ्य, पात्रको इमानदारी, कर्म र जनसेवामा गरेको योगदानको आधारमा प्रतिनिधि छनोट गर्नुपर्ने आवश्यकता रहेको बताएका छन्।

उनले पटक–पटक फरक–फरक दललाई जिताएर पठाउँदा पनि जनजीवन र देशको अवस्था सुधार हुन नसक्नुको मुख्य कारण उत्तरदायी नेतृत्वको अभाव रहेको उल्लेख गरेका छन्। पुराना दल मात्र होइन, नयाँ वैकल्पिक भनिएका पार्टीहरूमा समेत अवसरवादी प्रवृत्ति हाबी हुँदै गएको, सामाजिक कामको अनुभव र राजनीतिक चेतना नभएका तथा केवल सेलिब्रेटी छविका आधारमा उम्मेदवार चयन गर्ने क्रम बढ्दो रहेको उनको भनाइ छ।

यस्तो अवस्थामा भावनामा होइन, तथ्य र पात्रको गहिरो मूल्याङ्कन गरेर मतदान गर्ने संस्कार विकास गर्नु अत्यन्त आवश्यक रहेको उल्लेख गर्दै अध्यक्ष महतले गाउँ–टोलदेखि सहरसम्म पुगेर सचेतना कार्यक्रम, संवाद, छलफल र मतदाता शिक्षामार्फत नागरिकलाई जागरुक बनाइने जानकारी दिएका छन्।

पार्टीभन्दा माथि उठेर इमानदार, जवाफदेही र दिगो काम गर्ने नेतृत्व छान्ने संस्कार स्थापना गर्नु नै अभियानको मुख्य लक्ष्य रहेको उनले बताएका छन्। “अब हामीलाई झुक्किने छुट छैन, सचेत मतदाता नै राम्रो नेतृत्वको मूल आधार हो,” उनको भनाइ छ।