नवीन सिग्देलको माग : “भूमिहीन सुकुम्बासीबारे तत्काल साझा धारणा सार्वजनिक गरियोस्”

हेटौंडा,बैशाख २६ गते । हेटौंडा उपमहानगरपालिका–४ का वडाध्यक्ष तथा नेकपा एमाले केन्द्रीय लेखा आयोगका सदस्य नवीन सिग्देलले हेटौंडा क्षेत्रका भूमिहीन तथा सुकुम्बासी नागरिकको विषयमा स्थानीय तह र राजनीतिक दलहरूले तत्काल साझा धारणा सार्वजनिक गर्नुपर्ने बताएका छन्।

सामाजिक सञ्जाल फेसबुक मार्फत धारणा सार्वजनिक गर्दै उनले भूमिहीन सुकुम्बासीलाई मानवीय र व्यवहारिक पक्षलाई बेवास्ता गर्दै उठिबास लगाइएको भन्दै आपत्ति जनाएका हुन्। उनले विगतमा विभिन्न प्रयास भए पनि समस्याको दीर्घकालीन समाधान हुन नसकेको उल्लेख गर्दै अहिलेको अवस्थाले पीडित नागरिक थप पीडित बन्न पुगेको बताएका छन्।

उनले हेटौंडा उपमहानगरपालिकाको तत्काल बैठक बोलाई भूमिहीन, अव्यवस्थित बसोबासी तथा अतिक्रमित क्षेत्रको स्पष्ट वर्गीकरण गर्नुपर्ने आवश्यकता औंल्याएका छन्। साथै, कति वर्षदेखि बसोबास गर्दै आएका हुन्, उनीहरूको अवस्था के छ र व्यवस्थापन कसरी गर्ने भन्ने विषयमा स्थानीय तह र राजनीतिक दलहरूको साझा धारणा आउनुपर्ने उनको भनाइ छ।

सिग्देलले स्थानीय राजनीतिक दलहरूको मौनताप्रति पनि प्रश्न उठाएका छन्। उनले नेकपा एमाले मकवानपुर बाहेक अन्य दलहरूले यस विषयमा स्पष्ट धारणा सार्वजनिक नगरेको उल्लेख गर्दै स्थानीय नेतृत्वले अभिभावकीय भूमिका निर्वाह गर्नुपर्ने बताएका छन्।

उनले वर्तमान सरकारको कार्यशैलीप्रति असन्तुष्टि जनाउँदै नागरिक स्वतन्त्रता र न्यायमाथि प्रहार भइरहेको आरोप समेत लगाएका छन्। “संकटको बेला मौन बस्नु समाधान होइन,” भन्दै उनले स्थानीय जनप्रतिनिधि र राजनीतिक नेतृत्वले पीडित नागरिकको पक्षमा उभिनुपर्ने आवश्यकता औंल्याएका छन्।