जनताको घर भत्काएर विस्थापित गर्न हुँदैन : सांसद हर्कराज राई (साम्पाङ)

हेटौंडा,बैशाख २६ गते । हर्कराज राईले भूमिहीन सुकुम्बासी तथा अव्यवस्थित बसोबासीका नागरिकलाई घरबारविहीन बनाउने कार्य स्वीकार्य नहुने बताएका छन्।

शनिबार चितवन जाने क्रममा हेटौंडा आइपुगेका श्रम संस्कृति पार्टीका केन्द्रीय अध्यक्ष एवं सुनसरी क्षेत्र नम्बर–१ का प्रतिनिधिसभा सदस्य राईले हेटौंडा–११ थानाभर्याङस्थित भूमिहीन सुकुम्बासी तथा अव्यवस्थित बसोबासी समुदायसँगको छोटो छलफल कार्यक्रममा बोल्दै जनतालाई विस्थापित गर्नेभन्दा समस्या समाधानतर्फ राज्य केन्द्रित हुनुपर्ने बताएका हुन्।

उनले नेपालमा लामो समयदेखि रहेको अव्यवस्थित बसोबासी तथा सुकुम्बासी समस्यालाई समाधान गर्नुपर्नेमा आफू सदैव प्रतिबद्ध रहेको स्पष्ट पारे। प्रतिनिधिसभामा निर्वाचित भएपछि संसद् भवनको पहिलो बैठकमै आफूले सुकुम्बासी र अव्यवस्थित बसोबासीका मुद्दालाई मुख्य एजेण्डाका रूपमा उठाएको उनले बताए।

राईले सरकारले गरेका राम्रा तथा नराम्रा कामको निरन्तर मूल्यांकन गर्दै आएको उल्लेख गर्दै जनविरोधी गतिविधिविरुद्ध खबरदारी गर्न आफू कहिल्यै पछि नपरेको दाबी गरे। “सबै जनताले बाँच्न पाउनुपर्छ, यो संविधानले दिएको मौलिक अधिकार हो,” उनले भने, “घर बनाएर बस्न पाउनु नागरिकको अधिकारभित्र पर्छ। राज्यले आतंक सिर्जना गर्ने शैलीमा घर भत्काउने काम गर्नु हुँदैन।”

उनले मेचीदेखि महाकालीसम्मका नागरिकलाई एकजुट भएर जनताको घर भत्काएर घरबारविहीन बनाउने कदमविरुद्ध आवाज उठाउन आग्रह गरे। जनताको पक्षमा आफू सधैं उभिने उल्लेख गर्दै उनले संसद् र सडक दुवै ठाउँबाट नागरिकको बाँच्न पाउने अधिकारको पक्षमा आवाज बुलन्द गर्ने प्रतिबद्धता जनाए।

कार्यक्रममा उनले जनताको दुःख, समस्या र अधिकारको पक्षमा निरन्तर साथ, सहयोग र समर्थन रहने विश्वाससमेत दिलाएका थिए।