जन्मदिनले मानवसेवा र जिम्मेवारीप्रति थप उर्जा दिएको छ : मेयर मिना लामा

लाम्सुरे धाप, पुस २८ गते । हेटौंडा उपमहानगरपालिका मेयर मिना लामाले आफ्नो जन्मदिनका अवसरमा शुभेच्छुकबाट प्राप्त माया, स्नेह र सम्मानले आफूलाई मानवसेवा र सामाजिक उत्तरदायित्वप्रति अझ उर्जावान बनाएको बताएकी छन्।

सामाजिक सञ्जालमार्फत भावनात्मक सन्देश व्यक्त गर्दै मेयर लामाले हरेक वर्ष पुस २८ ले आफूलाई असंख्य शुभेच्छुकको प्रेम बोकेर आउने गरेको उल्लेख गरेकी छन्। जन्मदिनका अवसरमा उनले विशेष रूपमा आफ्ना बुबाआमा, विशेषगरी आमाको सम्झना गर्दै विगतका संघर्षपूर्ण दिनहरूलाई आत्मसात् गरेको उल्लेख गरेकी छन्।

ठूलाठूला उपलब्धि हासिल गर्ने अपेक्षा नराखे पनि साना दुःखबाट पीडित मानिसलाई सक्दो सहयोग गर्ने चाहना र प्रयास निरन्तर जारी रहेको उनको भनाइ छ। उमेर उकालो लागिरहेको अवस्थामा पनि राजनीति पेशाजस्तै बनेको उल्लेख गर्दै उनले आफ्नो मन भने मानवसेवामै रहेको स्पष्ट पारेकी छन्।

मेयर लामाले जन्मदिनमा प्राप्त प्रेम र स्नेहले आफूलाई सेवामा लाग्न थप प्रेरणा मिल्ने र नयाँ उर्जा प्राप्त हुने बताएकी छन्। “हरेक मानिसका लागि जन्म र मृत्युको अर्थ उसले गरेका कामले निर्धारण गर्छ,” भन्दै उनले अझै सन्तोष लाग्ने काम गर्न बाँकी रहेको स्वीकार गरेकी छन्।

यद्यपि, जीवन यात्रामा भेटघाट र चिनजान भएका अधिकांश शुभेच्छुकबाट प्राप्त सम्मान र माया नै आफ्नो ठूलो पूँजी भएको उल्लेख गर्दै पुस २७ र २८ गते आफूलाई उर्जा दिने सबैप्रति आभार व्यक्त गरेकी छन्।