बाघझोरा खहरेमा पुल निर्माणका लागि १० करोड बजेट सुनिश्चित, मकवानपुरबासीलाई दीर्घकालीन राहत

हेटौंडा, पुस २९ गते । मकवानपुर जिल्लावासीलाई खुसीको खबर प्राप्त भएको छ। त्रिभूवन राजमार्गअन्तर्गत भैसे–हेटौंडा सडक खण्डमा पर्ने बाघझोरा खहरे खोलामा पुल निर्माणका लागि प्रारम्भिक रूपमा १० करोड रुपैयाँ बजेटको स्रोत सुनिश्चित भएको छ।

नेकपा एमालेका नेता तथा पूर्व प्रतिनिधिसभा सदस्य महेश बर्तौलाले सामाजिक सञ्जालमार्फत जानकारी दिँदै, बाघझोरा खहरेका कारण हरेक वर्ष हजारौं यात्रुले भोग्दै आएको सास्तीलाई अन्त्य गर्न दीर्घकालीन समाधान खोजिएको बताएका छन्। उनका अनुसार, ओभरपास वा अण्डरपासमध्ये कुन विकल्प उपयुक्त हुने भन्ने विषयमा प्राविधिक अध्ययनसहित निर्माण प्रक्रिया अघि बढाइनेछ।

बर्तौलाका अनुसार, आफू प्रतिनिधिसभा सदस्य रहँदा निवर्तमान प्रधानमन्त्री केपी शर्मा ओली र तत्कालीन संघीय भौतिक पूर्वाधार तथा यातायात मन्त्री देवेन्द्र दाहालसँग आवश्यक बजेट व्यवस्थापनका लागि विशेष पहल गरिएको थियो। प्रतिनिधिसभा विघटनपछि पनि निरन्तर समन्वय र सहजीकरणका कारण पुल निर्माणका लागि बजेट सुनिश्चित हुन सफल भएको उनको भनाइ छ।

संघीय भौतिक पूर्वाधार तथा यातायात मन्त्रालयमार्फत केही हप्ताभित्र प्राविधिक अध्ययन सम्पन्न गरी ठेक्का प्रक्रिया अगाडि बढाइने तयारी भइरहेको जानकारी उनले दिएका छन्।

बाघझोरा खहरेमा पुल निर्माण सम्पन्न भएपछि थोरै वर्षामै खहरे बाढीका कारण घण्टौंसम्म सडक अवरुद्ध हुने समस्या अन्त्य हुने विश्वास व्यक्त गरिएको छ। साथै त्रिभूवन राजमार्ग हुँदै देशका विभिन्न भागमा यात्रा गर्ने यात्रुहरूलाई समेत सहजता मिल्ने अपेक्षा गरिएको छ।

पूर्व सांसद बर्तौलाले यस कार्यमा सकारात्मक सहयोग पुर्‍याउने सम्पूर्ण मकवानपुरबासीप्रति हार्दिक आभार व्यक्त गरेका छन्।