नेपालको राजनीति : आशा र निराशाको चक्रमा अल्झिएको यात्रा, नयाँ युगको प्रतीक्षामा जनता

हेटौंडा, माघ ५ गते । नेपालको राजनीतिक इतिहास निरन्तर परिवर्तन, संघर्ष र आशाको चक्रमा घुमिरहेको देखिन्छ। सेवा, सहयोग र आवाजमा हामीका अध्यक्ष तथा सामाजिक अभियान्ता विशाल राज महतले सामाजिक सञ्जालमार्फत सार्वजनिक गरेको धारणा अनुसार, नेपालले हरेक राजनीतिक परिवर्तनसँगै नयाँ आशा बोकेको भए पनि व्यवहारमा निराशा दोहोरिँदै आएको छ।

जंगबहादुर राणाबाट सुरु भएको श्री ३ को शासनदेखि १०४ वर्षे राणाशासन, त्यसपछि २००७ सालको प्रजातन्त्रको उदय, २०१७ सालको पञ्चायती व्यवस्था, २०४६ सालको बहुदल, २०५२ सालको जनयुद्ध हुँदै २०६२/६३ को जनआन्दोलन र गणतन्त्रसम्म आइपुग्दा सत्ता परिवर्तन भए तर जनताको जीवनस्तरमा अपेक्षित परिवर्तन हुन नसकेको महतको भनाइ छ।

२०७२ सालमा जारी संविधानले संघीयता, समावेशिता र लोकतन्त्रको बलियो आधार दिएको भए पनि संघीय संरचनाको खर्चिलो स्वरूप, भ्रष्टाचार र अव्यवस्थित विकासका कारण जनतामा असन्तुष्टि बढ्दै गएको उनले उल्लेख गरेका छन्।

संविधानपछि स्वतन्त्र उम्मेदवारहरूको उदय, काठमाडौं महानगरपालिकाका मेयर बालेन्द्र शाह (बालेन) को विजय र राष्ट्रिय स्वतन्त्र पार्टीजस्ता नयाँ दलहरूको आगमनले पुराना दलप्रतिको निर्भरता घट्दै नयाँ विकल्पको खोजी सुरु भएको संकेत देखिएको छ। यसलाई ‘स्वतन्त्र लहर’ को रूपमा चित्रण गर्दै महतले जनतामा अझै पनि परिवर्तनप्रतिको आशा जीवित रहेको बताएका छन्।

उनका अनुसार पात्रहरू फेरिए पनि प्रणाली नबदलिँदा समस्या दोहोरिइरहेका छन्। स्वास्थ्य, शिक्षा र रोजगारीजस्ता आधारभूत आवश्यकतामा जनता अझै अल्झिएको अवस्था छ। तर पनि निराशाका बीच आशावादी बन्नु बाहेक विकल्प नभएको उल्लेख गर्दै उनले नयाँ युगले साँच्चिकै परिवर्तन ल्याउने विश्वास व्यक्त गरेका छन्।

“जनता आज पनि नयाँ बिहानीको प्रतीक्षामा छन्। आशाको किरण देखिनासाथ बादल फाट्नेछन् र सुखी नेपाली, समृद्ध नेपालको युग सुरु हुनेछ,” महतले आफ्नो स्टाटसमार्फत आशावादी सन्देश दिएका छन्।