हेटौंडाको मेला महोत्सवमा पारदर्शिताको माग : एउटै संस्थालाई जिम्मा दिनु प्रश्नको विषय — विशालराज महत

हेटौँडा, फागुन २४ गते । हेटौंडामा विगतदेखि सञ्चालन हुँदै आएका मेला–महोत्सवप्रति पारदर्शिता र जवाफदेहिताको माग उठ्न थालेको छ। सेवा सहयोग र आवाज संस्थाका अध्यक्ष तथा सामाजिक अभियान्ता विशालराज महतले सामाजिक सञ्जाल फेसबुक मार्फत मेला सञ्चालन प्रक्रिया माथि गम्भीर प्रश्न उठाएका हुन्।

महतले आफ्नो फेसबुक स्टाटसमा हेटौंडामा वर्षौंदेखि मेला–महोत्सव हुँदै आए पनि त्यसबाट आम जनतालाई भन्दा केही व्यक्तिहरुको गोजी भर्ने काम मात्रै भइरहेको भन्ने व्यापक गुनासो रहेको उल्लेख गरेका छन्। उनले सम्बन्धित निकायले बारम्बार एउटै संस्थालाई मात्र मेला सञ्चालनको जिम्मेवारी दिनु आफैंमा प्रश्नको विषय भएको बताएका छन्।

उनले मेला सञ्चालनसँग सम्बन्धित टिकट दर, स्टल शुल्क तथा त्यसको मापदण्ड के हो भन्ने विषय स्पष्ट हुनुपर्ने बताएका छन्। यी विषयले प्रत्यक्ष रूपमा जनतालाई असर गर्ने भएकाले पारदर्शिता आवश्यक रहेको उनको भनाइ छ।

महतले खेलकुद गतिविधि गर्ने संस्थाले नै पटक–पटक व्यापार, कृषि र उद्योगसम्बन्धी मेला सञ्चालन गर्नु पर्ने अवस्था किन आएको भन्ने प्रश्न पनि उठाएका छन्। सम्बन्धित क्षेत्रका संस्थाहरू असफल भएका हुन् कि भन्ने जिज्ञासा समेत उनले व्यक्त गरेका छन्।

यो विषय गम्भीर भएकाले आफूहरूले पटक–पटक सचेत गराउँदै आएको उल्लेख गर्दै उनले आयोजक र सम्बन्धित निकायले पारदर्शिता र जवाफदेहिता सुनिश्चित गर्नुपर्ने बताएका छन्। अन्यथा यस विषयमा खबरदारी निरन्तर जारी रहने उनको चेतावनी छ।

हेटौंडामा मेला–महोत्सव सञ्चालनको विषयमा पछिल्लो समय नागरिक तहबाट पनि पारदर्शिता, स्पष्ट मापदण्ड र निष्पक्ष व्यवस्थापनको माग बढ्दै गएको छ।