एम्बुलेन्सलाई शववाहन बनाउने विषयमा अलमल : कानुनी प्रावधान नहुँदा प्रक्रिया रोकियो

हेटौंडा, फागुन २६ गते । मकवानपुरमा पुरानो एम्बुलेन्सलाई शववाहनका रूपमा प्रयोग गर्ने विषयमा कानुनी स्पष्टता नहुँदा प्रक्रिया अलमलमा परेको छ।

हिजो जनस्वास्थ्य कार्यालय मकवानपुरमा एम्बुलेन्स सञ्चालन सम्बन्धी विषयमा गरिएको छलफलका क्रममा मदन भण्डारी स्वास्थ्य विज्ञान प्रतिष्ठान अन्तर्गत सञ्चालनमा रहेको हेटौंडा अस्पतालमा शववाहन अभाव रहेको जानकारी प्राप्त भएको हो।

एम्बुलेन्स सेवा निर्देशिका २०८२ अनुसार १० वर्षभन्दा बढी सञ्चालन भएका “ग” वर्गका एम्बुलेन्स सञ्चालन गर्न नमिल्ने व्यवस्था रहेकाले हर्नामाडी स्वास्थ्य चौकीको एम्बुलेन्सलाई शववाहनका रूपमा प्रयोग गर्ने प्रस्ताव अघि बढाइएको थियो। सो एम्बुलेन्सलाई २०८२ माघ ४ गतेको निर्णयअनुसार शववाहनका रूपमा हस्तान्तरण गर्न सिफारिस गरिएको थियो। साथै २०८२ माघ १३ गते हेटौंडा उपमहानगरपालिकाले पनि सोही प्रयोजनका लागि सिफारिस गरेको बताइएको छ।

तर एम्बुलेन्स सेवा निर्देशिकामा एम्बुलेन्सलाई शववाहनमा रुपान्तरण गर्ने स्पष्ट प्रावधान उल्लेख नभएकाले प्रक्रिया अघि बढाउन समस्या भएको जनाइएको छ।

सेवा सहयोग र आवाजमा हामीका अध्यक्ष तथा सामाजिक अभियान्ता विशालराज महतले सामाजिक सञ्जाल फेसबुकमार्फत सार्वजनिक गरेको जानकारी अनुसार जनस्वास्थ्य अधिकृत तथा सूचना अधिकारी लक्ष्मण घिमिरे र जनस्वास्थ्य प्रशासक किरण श्रेष्ठले आवश्यक कानुनी व्यवस्था भएमा उक्त प्रस्तावलाई माथिल्लो निकायमा पठाउन आफूहरू तयार रहेको बताएका छन्।

सम्बन्धित निकायले आवश्यक कानुनी स्पष्टता दिएमा हेटौंडा अस्पतालमा देखिएको शववाहन अभावको समस्या समाधान हुने अपेक्षा गरिएको छ।