ओमानसँग नेपालको भारी हार, DLS का आधारमा १०२ रनले पराजित

काठमाडौं,बैशाख १६ गते । आईसीसी क्रिकेट विश्वकप लिग–२ अन्तर्गतको त्रिकोणात्मक श्रृंखलामा नेपालले ओमानविरुद्ध अपेक्षाकृत कमजोर प्रदर्शन गर्दै १०२ रनले हार बेहोरेको छ। कीर्तिपुरस्थित त्रिवि क्रिकेट मैदानमा सम्पन्न खेलमा टस जितेर पहिले ब्याटिङ गरेको ओमानले निर्धारित ५० ओभरमा ८ विकेट गुमाउँदै ३०५ रनको चुनौतीपूर्ण योगफल खडा गरेको थियो।

ओमानको जितमा कप्तान जतिन्दर सिंह प्रमुख नायक बने। उनले ९६ बलमा १३० रनको उत्कृष्ट पारी खेल्दा १५ चौका र ५ छक्का प्रहार गरे। साथै, जितेन रामानन्दीले ४३ र आर्यन बिष्टले ३५ रन जोड्दै टोलीको स्कोर बलियो बनाए। नेपालका लागि बलिङतर्फ सोमपाल कामीले उत्कृष्ट प्रदर्शन गर्दै ४ विकेट लिए भने सन्दीप लामिछाने र दीपेन्द्रसिंह ऐरीले समान २–२ विकेट झारे।

३०६ रनको लक्ष्य पछ्याउन मैदान उत्रिएको नेपालले सुरुआतदेखि नै दबाब झेल्नुपर्‍यो। ३६.५ ओभरमा ७ विकेट गुमाएर १५५ रन बनाएको अवस्थामा वर्षा बाधक बन्यो र खेल रोकियो। त्यसपछि डकवर्थ–लुइस (DLS) पद्धतिका आधारमा ओमानलाई १०२ रनले विजयी घोषित गरियो।

नेपालका लागि उपकप्तान दीपेन्द्रसिंह ऐरीले ६० रन बनाएर केही प्रतिरोध गरे भने भीम सार्कीले २८ रनको योगदान दिए। तर अन्य ब्याटरले अपेक्षित साथ दिन नसक्दा नेपाल ठूलो अन्तरले पराजित हुन पुग्यो।

यस जितसँगै ओमान २६ खेलबाट ३१ अंक जोड्दै तालिकाको तेस्रो स्थानमा उक्लिएको छ। उता, नेपाल २२ खेलमा १४ अंकसहित सातौँ स्थानमा सीमित रहेको छ। नेपालले अब आफ्नो अर्को खेल शुक्रबार यूएईविरुद्ध खेल्ने तालिका रहेको छ।