राप्ती–५ मा भूमिहीन तथा सुकुम्बासीको जग्गा यकिन गर्न १५ दिने सूचना जारी

चितवन,बैशाख १६ गते । चितवनको राप्ती नगरपालिका वडा नम्बर ५ कार्यालयले भूमिहीन दलित, भूमिहीन सुकुम्बासी तथा अव्यवस्थित बसोबासीहरूको जग्गा यकिन गर्ने प्रक्रिया अघि बढाएको छ। यस सम्बन्धमा वडा कार्यालयले १५ दिने सार्वजनिक सूचना जारी गर्दै आवश्यक कागजातसहित सम्बन्धित व्यक्तिहरूलाई उपस्थित हुन आग्रह गरेको छ।

वडा अध्यक्ष सिताराम तामाङद्वारा जारी सूचनामा, भूमिहीन सम्बन्धी समस्या समाधान आयोगमार्फत विगतका विभिन्न समयमा विवरण फाराम भरेका व्यक्तिहरूको जग्गा यकिन गर्नुपर्ने आवश्यकता रहेको उल्लेख गरिएको छ। सोही अनुसार, सम्बन्धित सबै पक्षलाई सूचना प्रकाशित भएको मितिले १५ दिनभित्र राप्ती नगरपालिका भूमिन शाखामा उपस्थित हुन अनुरोध गरिएको छ।

सूचनाअनुसार, उपस्थित हुँदा अनिवार्य रूपमा नागरिकताको प्रमाणपत्र वा राष्ट्रिय परिचयपत्र तथा जग्गाको पहिचान खुल्ने कागजात (जग्गाको निष्सा) साथमा ल्याउनुपर्नेछ।

वडा कार्यालयले तोकिएको समयसीमाभित्र आवश्यक कागजातसहित उपस्थित नभएमा प्रक्रिया प्रभावित हुन सक्ने भन्दै समयमै सम्पर्क गर्न सबैमा आग्रह गरेको छ।