५ वर्षदेखि अलपत्र झुलुङ्गे पुलका सामग्री छरपस्ट, गढि–५ का स्थानीय सेवा सुविधाबाट अझै वञ्चित

हेटौंडा, फागुन २८ गते । पाँच–छ वर्षदेखि निर्माण अलपत्र परेको झुलुङ्गे पुलका सामग्रीहरू सडक किनार तथा खुला स्थानमा छरपस्ट अवस्थामा भेटिएका छन्। पुल निर्माणका लागि ल्याइएका प्लेट तथा अन्य सरसामानहरू लामो समयसम्म प्रयोगमा नआउँदा बेवारिसे जस्तै अवस्थामा रहेका छन्।

पुल निर्माणमा प्रयोग हुने केही प्लेटहरू सुरक्षित राख्ने उद्देश्यले गढि गाउँपालिका वडा नम्बर ५ ले केही समयअघि आफ्नै सुरक्षा घेराभित्र राखेको देखिएको छ। तर बाँकी सामग्रीहरू भने व्यवस्थित रूपमा संरक्षण हुन नसकेको स्थानीयले बताएका छन्।

झुलुङ्गे पुल निर्माणको जिम्मा निर्माण कम्पनीले राडो नेपाललाई दिएको बुझिएको छ। तर बजेट अभाव, पुरानो प्रविधिको पुलको डिजाइन तथा अन्य प्रशासनिक कारणका कारण पुल निर्माण कार्य अहिलेसम्म सुरु हुन नसकेको जनाइएको छ।

पुल निर्माण अलपत्र पर्दा गडी–५ का स्थानीय घरधुरीहरू अहिले पनि आवतजावत तथा अन्य सेवाबाट वञ्चित हुन बाध्य भएका छन्। लामो समयदेखि प्रयोगविहीन अवस्थामा रहेको सामग्रीले राज्यको लगानी खेर जाने अवस्था देखिएको भन्दै स्थानीयले चिन्ता व्यक्त गरेका छन्।

राज्यको लगानी प्रयोगविहीन भएर खेर जान नदिन समस्या समाधान गरी पुल निर्माण कार्य छिटो अगाडि बढाउनुपर्ने माग स्थानीयको छ। यस विषयमा आवश्यक पहल गर्न स्थानीयले वडा अध्यक्षको ध्यानाकर्षण गराएका छन्।