समानुपातिकतर्फ मतगणना सम्पन्न : ६ दलले पाए प्रतिनिधिसभामा सिट

काठमाडौँ, फागुन २८ गते । निर्वाचन आयोग नेपालले प्रतिनिधिसभा सदस्य निर्वाचन २०८२ अन्तर्गत समानुपातिक निर्वाचन प्रणालीतर्फको सम्पूर्ण मतगणना सम्पन्न भएको जनाएको छ। आयोगका अनुसार पहिलो हुने निर्वाचित हुने निर्वाचन प्रणालीतर्फका सबै १६५ निर्वाचन क्षेत्रमा अन्तिम मतपरिणाम सार्वजनिक गरी विजयी उम्मेदवारहरूलाई प्रमाणपत्र प्रदान गरिसकिएको छ।

सम्वत् २०८२ साल फागुन २१ गते सम्पन्न प्रतिनिधिसभा सदस्य निर्वाचनमा कुल १ करोड ८९ लाख ३ हजार ६ सय ८९ मतदाता रहेकामा पहिलो हुने निर्वाचित हुने निर्वाचन प्रणालीतर्फ १ करोड ११ लाख ६८ हजार ३२ मत खसेको थियो। तीमध्ये १ करोड ५ लाख ५९ हजार १७ अर्थात् ९४ दशमलव ५५ प्रतिशत मत सदर भएको आयोगले जनाएको छ।

त्यसैगरी समानुपातिक निर्वाचन प्रणालीतर्फ १ करोड १२ लाख ८० हजार ६ सय १७ मत खसेको थियो। त्यसमध्ये १ करोड ८ लाख ३५ हजार २५ अर्थात् ९६ दशमलव ०५ प्रतिशत मत सदर भएको आयोगको विवरणमा उल्लेख छ।

प्रतिनिधिसभा सदस्य निर्वाचन ऐन २०७४ को दफा ६० अनुसार समानुपातिकतर्फको मतगणना सम्पन्न गरी प्राप्त कुल सदर मतका आधारमा सिट बाँडफाँट गरिएको आयोगले जनाएको छ। प्रचलित निर्वाचन कानुन अनुसार ३ प्रतिशत थ्रेसहोल्ड पार गर्ने ६ राजनीतिक दलले समानुपातिकतर्फ सिट प्राप्त गरेका छन्।

आयोगका अनुसार दलहरूले प्राप्त गरेको सिट संख्या यसप्रकार छः

राष्ट्रिय स्वतन्त्र पार्टी – ५७ सिट

नेपाली कांग्रेस – २० सिट

नेपाल कम्युनिस्ट पार्टी (एकीकृत मार्क्सवादी–लेनिनवादी) – १६ सिट

नेपाल कम्युनिस्ट पार्टी (माओवादी केन्द्र) – ९ सिट

श्रम संस्कृति पार्टी – ४ सिट

राष्ट्रिय प्रजातन्त्र पार्टी – ४ सिट

आयोगले प्राप्त सिट सङ्ख्याअनुसार प्रतिनिधि सभा सदस्य निर्वाचन नियमावली २०७४ तथा समानुपातिक निर्वाचन निर्देशिका २०८२ अनुसार ३ दिनभित्र निर्वाचित हुने उम्मेदवारहरूको नाम छनोट गरी आयोगमा पेश गर्न सम्बन्धित राजनीतिक दलहरूलाई पत्राचार गरिसकेको जनाएको छ।

आयोगका सहसचिव एवं प्रवक्ता नारायण प्रसाद भट्टराई ले जारी गरेको प्रेस विज्ञप्तिमा समानुपातिकतर्फको प्रक्रिया कानुनअनुसार अघि बढाइएको उल्लेख गरिएको छ।