हेटौँडा–४ का टोल विकास संस्थाको संयुक्त बैठक सम्पन्न, सडक सरसफाइदेखि क्षमता अभिवृद्धिसम्मका सात महत्वपूर्ण निर्णय

हेटौँडा, फागुन ३० गते । हेटौँडा उपमहानगरपालिका–४ मा रहेका टोल विकास संस्थाहरूको संयुक्त बैठक महत्वपूर्ण निर्णयसहित सम्पन्न भएको छ। शुक्रबार (फागुन ३०, २०८२) सम्पन्न बैठकले वडाभित्रको विकास, सरसफाइ, तालिम तथा टोल व्यवस्थापनलाई प्रभावकारी बनाउन विभिन्न सात निर्णय गरेको हो।

बैठकले वडाभित्र रहेका सबै सडकलाई सरसफाइ गर्दै कच्ची, खाल्डाखुल्टी, हिलो तथा धुलोमुक्त बनाउने गरी आर्थिक वर्ष २०८२ भित्र वडा कार्यालयको योजना कार्यान्वयन गर्न पहल गर्ने निर्णय गरेको छ।

यस्तै, आगामी चैत १२ गते वडा नम्बर ४ को आयोजनामा तथा टोल विकास संस्था नगर समन्वय समितिको व्यवस्थापनमा “भान्सा नै औषधालय” कार्यक्रम आयोजना गर्ने निर्णय गरिएको छ। उक्त कार्यक्रममा वडा नम्बर ४ भित्रका सबै टोल विकास संस्थाहरूको सहभागिता रहने जनाइएको छ।

बैठकले वडा कार्यालयको समन्वयमा सञ्चालन हुन गइरहेको निःशुल्क मन्टेश्वरी तथा कुक तालिममा सूचनाको मापदण्ड अनुसार प्रशिक्षार्थी सहभागी गराउने निर्णय पनि गरेको छ।

त्यसैगरी आगामी वैशाख महिनामा टोल विकास संस्थाहरूको क्षमता अभिवृद्धि कार्यक्रम सञ्चालन गर्ने, निर्माणाधीन रजत जयन्ती रोडको अधुरो काम अगाडि बढाउन सम्बन्धित निर्माण व्यवसायी तथा कार्यालयसँग पहल गर्ने लगायतका निर्णय गरिएको छ।

टोल सरसफाइ तथा टोलमा देखिने स–साना समस्याहरू समाधानका लागि प्रत्येक टोल विकास संस्थाले आफ्ना कार्यक्षेत्रमा अध्ययन तथा पहल गर्ने र अवधि पुगेका तर साधारणसभा गर्न बाँकी रहेका टोल विकास संस्थाहरूले तत्काल साधारणसभा आयोजना गर्ने निर्णय समेत बैठकले गरेको छ।

हेटौँडा–४ मा हाल २६ वटा टोल विकास संस्था सक्रिय रहेका छन्।

बैठकमा वडा अध्यक्ष नवीन सिग्देल, वडा सदस्य गीता त्रिपाठी, सदस्य जग्गनाथ पाण्डे, टोल विकास संस्था नगर समन्वय समितिका अध्यक्ष ध्रुव अधिकारी, महासचिव शिवहरी दाहाल, टोल विकास संस्था वडा समन्वय समितिका अध्यक्ष राजेन्द्रकुमार बस्ताकोटी, वडा कार्यालयका सचिव रामप्रसाद गुरागाईं तथा वडाभित्रका टोल विकास संस्थाका अध्यक्ष तथा पदाधिकारीहरूको उपस्थिति रहेको थियो।