रजतजयन्ति सडक निर्माण चाँडै सुरु हुने: वडाध्यक्ष सिग्देल

हेटौँडा, चैत १ गते । हेटौंडा उपमहानगरपालिका–४ स्थित रजतजयन्ति सडक निर्माण कार्य छिट्टै अगाडि बढाइने भएको छ। सो सडकलाई हेटौंडा उपमहानगरपालिकाको नमुना सडक बनाउने उद्देश्यसहित बजेटको स्रोत सुनिश्चित गरी प्रक्रियागत रूपमा काम अगाडि बढाइएको भए पनि विभिन्न कारणले निर्माण कार्य ढिलाइ भएको बताइएको छ।

वडा नम्बर–४ का वडाध्यक्ष नवीन सिग्देलले सामाजिक सञ्जालमार्फत जानकारी दिँदै सडक निर्माण कार्य अपेक्षाअनुसार अघि बढ्न नसकेको स्वीकार गरेका छन्। उनले समयमा नै गुणस्तरीय काम सम्पन्न गराउने विषयमा जनप्रतिनिधिको तर्फबाट कुनै कमी नरहेको उल्लेख गर्दै निर्माण व्यवसायी तथा सम्बन्धित कार्यालयसँग निरन्तर पहल भइरहेको बताए।

सिग्देलका अनुसार जिम्मेवारी पाएको निर्माण कम्पनी र सम्बन्धित कार्यालयका प्रमुखसँग छलफल गरी काम छिटो अघि बढाउन पहल भइरहेको छ। उनले यसै हप्ताभित्र निर्माण कार्य अगाडि बढाउने प्रतिबद्धता प्राप्त भएको जानकारी पनि गराएका छन्।

वडाध्यक्ष सिग्देलले स्थानीयवासीलाई धैर्य गर्न आग्रह गर्दै सडक निर्माणलाई गति दिन वडा कार्यालयको तर्फबाट थप प्रयास जारी रहने बताएका छन्।

रजतजयन्ति सडकलाई नमुना सडकको रूपमा विकास गर्ने लक्ष्यसहित उपमहानगरपालिकाले योजना अघि बढाएको हो।