अन्तर्राष्ट्रिय तनावको असर: नेपालमा पेट्रोलमा १५ र डिजेल–मट्टितेलमा १० रुपैयाँ वृद्धि

काठमाडौं, चैत्र १ गते । अन्तर्राष्ट्रिय बजारमा पेट्रोलियम पदार्थको मूल्यमा भएको निरन्तर वृद्धि तथा पछिल्लो समय देखिएको अन्तर्राष्ट्रिय राजनीतिक तनावका कारण नेपालमा पेट्रोलियम पदार्थको मूल्य बढाइएको छ। नेपाल आयल निगम लिमिटेड ले पेट्रोलमा प्रतिलिटर १५ रुपैयाँ तथा डिजेल र मट्टितेलमा प्रतिलिटर १० रुपैयाँका दरले मूल्य वृद्धि गरेको जनाएको छ। नयाँ मूल्य आज राति १२ बजेदेखि लागू हुने निगमले जानकारी दिएको छ।

निगमका अनुसार मूल्य समायोजनपछि तेस्रो वर्ग अन्तर्गत पर्ने काठमाडौं, पोखरा र दिपायल क्षेत्रमा पेट्रोलको मूल्य प्रतिलिटर १७२ रुपैयाँ कायम भएको छ भने डिजेल र मट्टितेलको मूल्य प्रतिलिटर १५२ रुपैयाँ पुगेको छ। त्यस्तै दोस्रो वर्ग अन्तर्गत पर्ने दाङ र सुर्खेतमा पेट्रोलको मूल्य १७१ रुपैयाँ तथा डिजेल र मट्टितेलको मूल्य १५१ रुपैयाँ निर्धारण गरिएको छ।

यस्तै पहिलो वर्ग अन्तर्गत पर्ने चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र वीरगञ्ज क्षेत्रमा पेट्रोलको मूल्य प्रतिलिटर १६९ रुपैयाँ ५० पैसा तथा डिजेल–मट्टितेलको मूल्य प्रतिलिटर १४९ रुपैयाँ ५० पैसा कायम गरिएको निगमले जनाएको छ।

निगमका अनुसार मध्यपूर्व तथा पश्चिम एसियामा देखिएको तनाव र युद्धको वातावरणले अन्तर्राष्ट्रिय बजारमा पेट्रोलियम पदार्थको मूल्यमा अत्यधिक उतार–चढाव आएको छ। विशेषगरी अमेरिका–इजरायल–इरानबीच देखिएको तनावका कारण अन्तर्राष्ट्रिय बजार प्रभावित हुँदा त्यसको असर नेपालमा आयात हुने पेट्रोलियम पदार्थमा समेत परेको निगमको भनाइ छ।

नेपाल जस्तो पेट्रोलियम पदार्थको आफ्नै स्रोत नभएको मुलुकमा अन्तर्राष्ट्रिय बजारको मूल्य वृद्धिले आपूर्ति तथा मूल्य व्यवस्थापनमा थप दबाब सिर्जना गर्ने गरेको निगमले जनाएको छ। अन्तर्राष्ट्रिय बजारमा मूल्य बढिरहँदा मूल्य समायोजन नगरेमा भारतीय आयल कर्पोरेसनलाई तिर्नुपर्ने भुक्तानीमा समस्या आउनुका साथै आपूर्ति व्यवस्थामा अवरोध आउने सम्भावना रहने निगमको भनाइ छ।

निगमले जारी गरेको विज्ञप्तिमा भनिएको छ, “यस विषम परिस्थितिबीच नेपाल आयल निगम लिमिटेडले बाध्यतावश पेट्रोलियम पदार्थको मूल्य अपेक्षाभन्दा बढाउनुपरेको छ। यसबाट आम उपभोक्ता तथा सरोकारवालामा पर्ने असरप्रति निगम सचेत र संवेदनशील छ।”

निगमले अन्तर्राष्ट्रिय बजारमा मूल्य घटेमा स्वदेशमा पनि मूल्य घटाउने प्रतिबद्धता दोहोर्याउँदै उपभोक्ता तथा सरोकारवालासँग सहयोगको अपेक्षा गरेको छ। साथै हालको मूल्य समायोजनपछि पनि निगमले मासिक रूपमा ठूलो आर्थिक भार व्यहोर्नु परेको जनाएको छ।

नेपाल आयल निगम लिमिटेडले जारी गरेको मूल्य वृद्धिको प्रेस विज्ञप्ति यस्तो छ हेर्नुहोस्।