चैत्र २१ मा मकवानपुर उद्योग वाणिज्य संघको ५९औँ साधारण सभा, कृषि प्रदर्शनी पनि आयोजना हुँदै

हेटौँडा, चैत ५ गते । मकवानपुर उद्योग वाणिज्य संघले आफ्नो ५९औँ वार्षिक साधारण सभा आगामी चैत्र २१ गते शनिबार आयोजना गर्ने भएको छ। फागुन १५ गते बसेको संघको कार्यसमिति बैठकले हेटौंडास्थित पल्पसा हलमा साधारण सभा गर्ने निर्णय गरेको हो।

संघका अध्यक्ष प्रमोद सिंह रानाभाटका अनुसार साधारण सभाको उद्घाटन बागमती प्रदेशका मुख्यमन्त्री ईन्द्र बहादुर बानियाँको प्रमुख आतिथ्यतामा सम्पन्न हुनेछ। त्यसैगरी, संघका केन्द्रीय वरिष्ठ उपाध्यक्ष अञ्जन श्रेष्ठ विशिष्ट अतिथिको रूपमा सहभागी हुने कार्यक्रम तय गरिएको छ।

महासचिव प्रतिमा श्रेष्ठले साधारण सभामा संघको विधान संशोधनसम्बन्धी प्रस्ताव प्रस्तुत गरिने तयारी भइरहेको जानकारी दिए।

यसैबीच, मकवानपुर उद्योग वाणिज्य संघको कृषि प्रवर्द्धन समितिको आयोजनामा बागमती प्रदेशस्तरीय कृषि प्रदर्शनी २०८२ पनि हुने भएको छ। प्रदर्शनीमा प्रदेशका विभिन्न जिल्लाबाट किसानहरूले उत्पादन गरेका कृषि उपज, रैथाने बाली, साथै आधुनिक कृषि औजार, उपकरण र प्रविधिहरू प्रदर्शन गरिने बताइएको छ।

समिति संयोजक निलम पाण्डेका अनुसार उक्त प्रदर्शनी चैत्र १३ गतेदेखि १६ गतेसम्म सोही पल्पसा हलमा सञ्चालन गरिनेछ।