“कागजमा आकर्षक, परिणाममा प्रश्न: बागमती प्रदेश युवा परिषद्का कार्यक्रमप्रति विशालराज महतको गम्भीर प्रश्न”

हेटौंडा, चैत २५ गते । बागमती प्रदेश युवा परिषद्का कार्यक्रमहरू कागजमा आकर्षक देखिए पनि तिनको वास्तविक उपलब्धि कति भयो भन्ने विषयमा गम्भीर प्रश्न उठाइएको छ। सामाजिक अभियान्ता तथा “जनगुनासो – न्यायको आवाज” अभियानका अध्यक्ष विशालराज महतले आफ्नो सामाजिक सञ्जाल फेसबुक मार्फत यसबारे स्पष्ट प्रश्न उठाएका छन्।

महतले युवालाई सबल, प्रतिस्पर्धी र आत्मनिर्भर बनाउने लक्ष्यसहित सञ्चालन गरिएको सिपमूलक तालिम, उद्यमशीलता विकास, नेतृत्व विकास तथा युवा सम्मेलन जस्ता कार्यक्रमहरूको प्रभावकारिता माथि प्रश्न गरेका छन्। उनले कार्यक्रमहरू सञ्चालनमा रहेको दाबी गरिए पनि वास्तविक परिणाम अझै अस्पष्ट रहेको बताएका छन्।

उनले विशेषगरी यस्ता प्रश्नहरू उठाएका छन्—
कति युवाले सिपमूलक तालिम पाए?
तीमध्ये कति रोजगारी वा स्वरोजगारमा जोडिए?
३९० घण्टे तालिम लिनेहरूको वास्तविक उपलब्धि के रह्यो?
उद्यमशीलता कार्यक्रमबाट कति व्यवसाय सुरु भए र तीमध्ये कति दिगो रूपमा सञ्चालनमा छन्?

त्यसैगरी उनले खर्च भएको बजेट र प्राप्त उपलब्धिबीचको सम्बन्ध स्पष्ट पार्नुपर्ने माग गरेका छन्। “कार्यक्रम गर्नु मात्रै उपलब्धि होइन, त्यसको परिणाम देखिनु आवश्यक छ,” महतले उल्लेख गरेका छन्।

उनका अनुसार युवाको नाममा बजेट खर्च गर्नु भन्दा पनि युवाको जीवनमा प्रत्यक्ष परिवर्तन ल्याउने खालका परिणाममुखी कार्यक्रम आवश्यक छन्। उनले यसका लागि स्पष्ट तथ्यांक, पारदर्शी विवरण तथा परिणाममुखी मूल्यांकन सार्वजनिक गर्न सम्बन्धित निकायसँग आग्रह गरेका छन्।

“यदि यस्ता कार्यक्रमहरूको पारदर्शिता र प्रतिवेदन सार्वजनिक गरिएन भने ‘समृद्ध प्रदेश’ को सपना केवल कागजमै सीमित रहने खतरा छ,” महतले चेतावनी दिएका छन्।

“जनगुनासो – न्यायको आवाज” अभियानले आम नागरिकका गुनासा, पीडा र अन्यायलाई सम्बन्धित निकायसम्म पुर्‍याउँदै पारदर्शिता, जवाफदेहिता र सुशासनका लागि निरन्तर आवाज उठाउँदै आएको छ।