हेटौंडा–१८ भक्तिचोकमा मोटरसाइकल ठोक्किँदा एकको मृत्यु, ४ जना घाइते

हेटौँडा, वैशाख ४ गते । मकवानपुरको हेटौंडा उपमहानगरपालिका–१८ भक्तिचोकस्थित धरान–चतरा सडकखण्डमा दुई मोटरसाइकल एकआपसमा ठोक्किँदा एक जनाको मृत्यु भएको छ भने चार जना घाइते भएका छन्।

जिल्ला प्रहरी कार्यालय मकवानपुरका अनुसार हेटौंडाबाट फुर्केचौरतर्फ जाँदै गरेको ना ३९ प ३७५ नम्बरको मोटरसाइकल र विपरित दिशाबाट आइरहेको बा.प्र.०३–००५ प ७२१९ नम्बरको मोटरसाइकल एकआपसमा ठोक्किँदा दुर्घटना भएको हो।

दुर्घटनामा अन्त बहादुर बि.सी., राजु थिङ, सुर्यमणी खतिवडा र प्रशान्त वाइबा घाइते भएका छन्। घाइतेहरूलाई तत्काल उपचारका लागि हेटौंडा अस्पताल पठाइएको थियो।

उपचारकै क्रममा अन्दाजी ३५/३६ वर्षका एक पुरुषको आज दिउँसो करिब १:३० बजे मृत्यु भएको प्रहरीले जनाएको छ। मृतकको पहिचान खुल्न बाँकी रहेको छ।

दुवै मोटरसाइकल प्रहरी चौकी ठुलोदमारको नियन्त्रणमा राखिएको छ भने घटनाबारे थप अनुसन्धान भइरहेको जिल्ला प्रहरी कार्यालय मकवानपुरले जनाएको छ।