सुन्दर लामाको फेसबुक स्टाटस चर्चामा: हर्क सम्पाङलाई ‘अन्तिम राजनीतिक विकल्प’ भन्दै पुराना नेतासँग तुलना

हेटौँडा,बैशाख ७ गते । श्रम संस्कृति पार्टीका केन्द्रीय सदस्य तथा जिल्ला इन्चार्ज सुन्दर लामाले आफ्नो फेसबुक वालमा गरेको एक राजनीतिक टिप्पणी अहिले सामाजिक सञ्जालमा चर्चाको विषय बनेको छ।

लामाले आफ्नो स्टाटसमा हर्क सम्पाङलाई लक्षित गर्दै उनी पत्रकारहरूले सोध्ने ठाडा प्रश्नहरूलाई पनि सहज रूपमा हाँस्दै जवाफ दिने नेताका रूपमा चित्रण गरेका छन्। उनले यसलाई अन्य राजनीतिक नेताहरूको व्यवहारसँग तुलना गर्दै पुराना दलका शीर्ष नेताहरू—शेरबहादुर देउवा, केपी शर्मा ओली र पुष्पकमल दाहाल ‘प्रचण्ड’ जस्ता बारम्बार प्रधानमन्त्री भइसकेका नेताहरूले भने पत्रकारका प्रश्नहरूमा कहिलेकाहीँ आक्रोश व्यक्त गर्ने गरेको टिप्पणी गरेका छन्।

लामाले हर्क सम्पाङलाई अन्य नेताभन्दा फरक शैली भएको व्यक्ति भन्दै उनको व्यवहार र कार्यशैलीप्रति विश्वास व्यक्त गरेका छन्। उनले आफ्नो पोस्टमा हर्क सम्पाङको नेतृत्वमा रहेको श्रम संस्कृति पार्टीलाई आगामी राजनीतिक विकल्पका रूपमा प्रस्तुत गर्दै “अन्तिम विकल्प” यही हुन सक्ने आशयसमेत व्यक्त गरेका छन्।

लामाको उक्त अभिव्यक्तिले सामाजिक सञ्जालमा मिश्रित प्रतिक्रिया ल्याएको छ। केही प्रयोगकर्ताले उनको विचारको समर्थन गरेका छन् भने केहीले यसलाई व्यक्तिगत राजनीतिक धारणा भन्दै आलोचना गरेका छन्।