विद्यार्थीलाई सार्वजनिक सवारीमा ४५ प्रतिशत छुट सुविधा उपलब्ध गराउन सरकारको निर्देशन

काठमाडौं,बैशाख ९ गते । नेपाल सरकार, भौतिक पूर्वाधार तथा यातायात मन्त्रालयअन्तर्गत यातायात व्यवस्था विभागले विद्यार्थीहरूलाई सार्वजनिक सवारीमा ४५ प्रतिशत छुट सुविधा उपलब्ध गराउन निर्देशन दिएको छ। विभागले हालै जारी गरेको पत्रमार्फत यातायात व्यवसायी तथा सम्बन्धित संघ–संस्थाहरूलाई उक्त सुविधा प्रभावकारी रूपमा कार्यान्वयन गर्न आग्रह गरेको हो।

विभागका अनुसार गत असोज ११ गते बसेको बैठकले विद्यार्थीहरूलाई सवारी भाडामा छुट दिने निर्णय गरेको थियो। सो निर्णयअनुसार देशभरका सार्वजनिक सवारी साधनमा अध्ययनरत विद्यार्थीहरूले ४५ प्रतिशतसम्म भाडा छुट पाउने व्यवस्था गरिएको छ।

पत्रमा भनिएको छ कि नेपाल सरकारका विभिन्न प्लेटफर्महरू (जस्तै ‘हेलो सरकार’ र गुनासो पोर्टल) मार्फत विद्यार्थीहरूले छुट सुविधा नपाएको गुनासो बढ्दो रूपमा आएको छ। यसले निर्णय कार्यान्वयनमा कमजोरी देखिएको संकेत गरेको भन्दै विभागले सबै सरोकारवालालाई तत्काल ध्यान दिन निर्देशन दिएको छ।

यातायात व्यवस्था विभागले नेपाल यातायात व्यवसायी राष्ट्रिय महासंघ, सार्वजनिक यातायात केन्द्रीय महासंघ तथा साझा यातायात सहकारी संस्था लिमिटेडलाई पत्राचार गर्दै विद्यार्थीहरूलाई उपलब्ध गराइने छुट सुविधा सुनिश्चित गर्न र सोको अनुगमनलाई प्रभावकारी बनाउन अनुरोध गरेको छ।

सरकारको यस निर्णयले विद्यार्थीहरूको आर्थिक भार केही हदसम्म कम गर्ने अपेक्षा गरिएको छ। तर, व्यवहारमा यसको पूर्ण कार्यान्वयन अझै चुनौतीपूर्ण देखिएको छ।