हेटौंडामा एक दिवसीय आमा सेमिनार हुने

धर्तीमै छ सबै चिज खोजे मिल्छ घरी घरी
तर जन्मदिने आमा बाबा पाइँदैन कसै गरी

हेटौंडा । मानवसेवा आश्रमले आफ्नो मानवता प्रवद्र्धधन कार्यक्रम अन्तर्गत आमा सेमिनार कार्यक्रम आयोजना गरिरहेको छ । सोही क्रममा बागमती प्रदेशको राजधानी हेटौंडामा एक दिवसीय आमा सेमिनार कार्यक्रम हुने भएको छ । आउँदो असोज १४ गते आइतबार हेटौंडाको ओम्याक्स सिनेमा हलमा ३ बजेदेखि बेलुका ६ बजेसम्म आमा सेमिनार कार्यक्रम हुने बताएको छ ।

मानवता, राष्ट्रियता, परोपकार, राष्ट्र प्रेम र आफूलाई जन्मदिने मातापिताको महत्त्व बोध गराई प्रेम, सद्भाव, करुणालाई जनजनमा, मनमनमा पु¥याउने उद्देश्यले कार्यक्रम हुन लागिएको हेटौंडा–९, मयुरधापस्थित मानवसेवा आश्रमका अभियान्ता होमनाथ पौडेलले जानकारी दिनुभयो । सहयोगापेक्षी सडक आश्रित मानव मुक्त राष्ट्र निर्माणको परिकल्पनालाई पुरा गर्ने आधार तयार गर्न राष्ट्रव्यापी रुपमा मानवता प्रवद्र्धनको कार्यक्रम आयोजना गरिरहेको छ ।

गत भदौ २० गतेदेखि असोज १२ गतेसम्म (२२ दिन) बेलायतका विभिन्न सहरमा आमा सेमिनार कार्यक्रम सम्पन्न गरी मानवसेवा आश्रमका केन्द्रीय अध्यक्ष रामजी अधिकारीको गृह जिल्ला मकवानपुरको हेटौंडामा कार्यक्रम गर्न लागेका हुन । देशलाई नै सहयोगापेक्षी सडक आश्रित मानवमुक्त राष्ट्र निर्माणको परिकल्पना गरी सेवा गरिरहेका आश्रमले यो सेमिनार मकवानपुर जिल्लालाई केन्द्र बनाई जिल्लास्थित सम्पूर्ण जनप्रतिनिधिहरुलाई कार्यक्रममा सहभागी गराइने छ ।

कार्यक्रममा आमा समुह, टोल विकास समिति, युवा समुह वा क्लब, शिक्षकशिक्षिका, विद्यार्थी, कर्मचारी, धार्मिक तथा आध्यात्मिक संघ संस्थाको प्रतिनिधिहरु, गैरसरकारी संस्थाका प्रतिनिधिहरु, महिला स्वास्थ्य स्वयमसेविकाहरु, सञ्चारकर्मीहरु गरी ४ सय जनाको सहभागिता हुनेछ । जनजनमा सकारात्मक सोच, सृजनशीलता, रचनात्मकता, मानवीयता र सामाजिक भावनासहितको असल, आत्म संयमित, विवेकशील र आत्मनिर्भर बनाउने उद्देश्यले विभिन्न शीर्षकमा कार्यक्रम हुने पौडेलले जानकारी दिनुभयो ।

सामाजिक तथा पारिवारिक भावना जगाई जिम्मेवार र कर्तव्यनिष्ठ नागरिक बनाउने, आमा बाबाको महत्त्व र महिमा बोध गराउँदै राष्ट्र, राष्ट्रियता र मातृभूमिप्रतिको सम्मान बढाउने, म, मलाई र मेरो परिवार भन्दामाथि मानवीय सेवाको लागि प्रेरित गर्न आमा सेमिनार कार्यक्रमले सहयोग पुग्ने छ । यसैगरी व्यक्तिमा सृजनशीलता, रचनात्मकता, सामाजिक मूल्यमान्यताहरुसहित सकारात्मक सोचको विकासका लागि पथ प्रदर्शन गर्ने, अहङ्कार, रिस, घमन्ड, लोभ जस्ता नकारात्मक मानवीय संवेगहरुलाई कम गरी दया, प्रेम, स्नेह, करुणा, अनुशासन जस्ता सकारात्मक आचरण विकासका लागि प्रेरित गर्दै सामाजिक व्यक्तित्व निर्माणमा सहयोग गर्न सहयोग पुग्दछ ।

पारिवारिक सम्बन्धमा बढेको तिक्ततालाई न्यूनीकरण गरी सम्बन्ध सुमधुर बनाउने, सहयोगापेक्षी सडक मानवमुक्त राष्ट्र नेपालको लक्ष्य प्राप्तिका लागि आधार तय गर्न सहयोगका लागि आमा सेमिनार हुने बताएको छ । यस्तै हेटौंडापछि आउँदो असोज २० गते कास्की पोखरा, २७ गते मेचीनगर झापामा हुने छ । गत साउन १३ गते पर्सा वीरगन्जको टाउन हलमा आयोजना गरिएको कार्यक्रममा ७ सय जनाको सहभागिता रहेको थियो । देश तथा विदेशमा ख्यातिप्राप्त मानवसेवा आश्रमका संस्थापक केन्द्रीय अध्यक्ष रामजी अधिकारीले उक्त कार्यक्रममा प्रशिक्षण दिनुहुनेछ ।