नवनियुक्त अर्थमन्त्रीलाई तरलता बढाएर ब्याजदर घटाउन उद्योगी–व्यवसायी माग

नेपाल उद्योग वाणिज्य महासंघले केन्द्रीय बैंक र सरकारको संयुक्त पहलमा तरलता प्रवाह गरेर ब्याजदर घटाउन आग्रह गरेको छ । महासंघ अध्यक्ष शेखर गोल्छा नेतृत्वको टोलीले नवनियुक्त अर्थमन्त्री डा. प्रकाशशरण महतलाई आइतवार भेटेर यस्तो आग्रह गरेको हो ।

भेटमा महासंघ अध्यक्ष गोल्छाले सहकारी र लघुवित्तमा तरलता सृजना हुनेगरी काम अघि बढाउन पनि आग्रह गरे । सरकारी खर्च निकै सुस्त रहेको भन्दै उनले त्यसलाई बढाउन सुझाए । ‘अहिले राजस्वले चालू खर्च धान्न समेत मुश्किल पर्न थालेको छ,’ उनले भने, ‘यो अवस्थामा बाह्य ऋण लिएर भए पनि पूँजीगत खर्च गर्नुपर्छ ।’

राज्य संयन्त्र पूर्णरूपमा प्रयोग गरेर सीमाबाट हुने अवैध आयात रोक्न सके राजस्व वृद्धिमा योगदान हुने गोल्छाले बताए । उनले विदेशबाट लगानी भित्र्याउन दाताहरूसँग पहल गर्न पनि आग्रह गरे ।

निजीक्षेत्रको अर्को संस्था नेपाल उद्योग परिसंघले पनि आइतवार नै अर्थमन्त्री डा. महतलाई भेटेर १० बुँदे सुझाव दिएको छ । भेटमा परिसंघ अध्यक्ष विष्णुकुमार अग्रवालले हालको चुनौतीपूर्ण अर्थतन्त्रमा तत्काल सुधार ल्याउन ब्याजदर घटाउनुपर्ने, तरलता सहज गराउनुपर्ने तथा लगानी प्रोत्साहित गर्नुपर्ने बताए । यी तीन विषयलाई केन्द्रमा राखेर उच्च मनोबलका साथ काम गरे अर्थतन्त्रमा छिटो सुधार आउने उनको भनाइ छ ।

दुवै टोलीलाई अर्थमन्त्री डा. महतले संकटोन्मुख अर्थतन्त्र सुधार नै आफ्नो मुख्य प्राथमिकता र प्रतिबद्धता रहेको बताए । उनले अर्थतन्त्रका समस्या समाधानमा निजीक्षेत्रको सहयोग आवश्यक रहेको पनि बताए । अर्थमन्त्रीले निजीक्षेत्रको मनोबल घट्न नदिने र निरन्तर संवादमा रहने आश्वासन दिएका छन् ।