जेठ १० देखि नागढुंगा–नौबिसे सडकखण्ड दैनिक साढे चार घण्टा बन्द हुने

काठमाडौँ। राजधानी भित्रिने मुख्य सडकमार्गको रूपमा रहेको नागढुंगा–नौबिसे सडकखण्ड यही जेठ १० गतेदेखि २५ गतेसम्म दैनिक साढे चार घण्टा बन्द हुने भएको छ। काठमाडौंका प्रमुख जिल्ला अधिकारी ऋषिराम तिवारीले दिएको जानकारी अनुसार, बिहान १०:३० बजेदेखि दिउँसो ३ बजेसम्म सडक बन्द गरी निर्माण कार्य अघि बढाइनेछ।

यो निर्णय काठमाडौं र धादिङ जिल्ला प्रशासनको समन्वयमा भएको हो। यसअघि यो सडकखण्डमा रातिको समयमा काम हुँदै आएको थियो। आयोजनाले नागढुंगा–पिपलामोड सडक निर्माणका लागि दिउँसो काम गर्नुपर्ने आवश्यकता रहेको बताएपछि स्थानीय प्रशासनले अनुमति दिएको हो। प्रजिअ तिवारीका अनुसार, प्राविधिक रूपमा दिउँसो नै निर्माण कार्य गर्नुपर्ने भएपछि सोही अनुरूप अनुमति दिइएको हो।

सडक बन्द हुने समयमा काठमाडौंबाट जाने सवारीसाधनलाई नागढुंगामा र नौबिसेतर्फबाट आउने सवारीसाधनलाई खानीखोलामा रोकिने नारायणगढ–मुग्लिन सडक योजना (पूर्वी खण्ड) ले जनाएको छ। वैकल्पिक मार्गका रूपमा धार्के–सितापाइला तथा टोखा–छहरे त्रिशूली गल्छी सडक प्रयोग गर्न अनुरोध गरिएको छ।