कक्षा १२ को प्रश्नपत्र परीक्षा अगावै सार्वजनिक गर्ने दुई जना साइबर ब्युरोद्वारा पक्राउ

काठमाडौं,बैशाख २९ गते । नेपाल प्रहरी साइबर ब्युरो ले कक्षा १२ को प्रश्नपत्र परीक्षा सुरु हुनुअघि नै सामाजिक सञ्जालमार्फत उत्तरसहित सार्वजनिक गर्ने कार्यमा संलग्न दुई जनालाई पक्राउ गरेको जनाएको छ।

राष्ट्रिय परीक्षा बोर्डद्वारा सञ्चालन भइरहेको कक्षा १२ को परीक्षाको प्रश्नपत्र परीक्षा सुरु हुनुभन्दा केही समयअघि नै बाहिरिएको विषयमा अनुसन्धान गर्न राष्ट्रिय परीक्षा बोर्डले साइबर ब्युरोलाई पत्राचार गरेको थियो। सोही आधारमा ब्युरोले प्राविधिक विश्लेषण तथा अनुसन्धान अघि बढाएको जनाएको छ।

अनुसन्धानका क्रममा “Class 12 Management Only” नामक व्हाट्सएप ग्रुप तथा फेसबुक मेसेन्जरसहित विभिन्न सामाजिक सञ्जाल समूहहरू प्रयोग गरी प्रश्नपत्र र उत्तर सार्वजनिक गरिएको खुल्न आएको प्रहरीले जनाएको छ।

प्रहरीका अनुसार प्रश्नपत्रको गोपनीयता भंग गर्ने कार्यमा संलग्न रहेको आरोपमा जिल्ला सुर्खेत वीरेन्द्रनगर नगरपालिका–८ घर भई हाल काठमाडौं महानगरपालिका–३२ सुविधानगर बस्ने ३७ वर्षीय निराजन शाही र धादिङ जिल्ला,नीलकण्ठ नगरपालिका–३ घर भई हाल काठमाडौं बुढानीलकण्ठ नगरपालिका–१० कपन बस्ने ३० वर्षीय प्रेमकुमार श्रेष्ठ पक्राउ परेका छन्।

उनीहरूलाई साइबर ब्युरोबाट खटिएको टोलीले वैशाख २८ गते चाबहिल, काठमाडौंबाट पक्राउ गरेको हो। घटनाबारे थप अनुसन्धान भइरहेको साइबर ब्युरोका प्रवक्ता एवं सूचना अधिकारी प्रहरी उपरीक्षक दिलोप कुमार गिरीले जानकारी दिएका छन्।