गृहमन्त्रीसमक्ष सुरक्षा सुदृढीकरण र निष्पक्ष निर्वाचनका लागि तात्कालिक कदम चाल्न भैरव ग्रुपको माग

ललितपुर, मंसिर ४ गते । भैरव ग्रुप, याला सदक ललितपुरले देशभर बढ्दै गएको असुरक्षा, राजनीतिक अनिश्चितता र जनस्तरमा फैलिएको चिन्ताप्रति गम्भीर चासो व्यक्त गर्दै गृह मन्त्रालयका सम्माननीय गृहमन्त्री ओम प्रकाश अर्यालसमक्ष व्यापक ध्यानाकर्षण गराएको छ। समूहले मंसिर ४ गते गृहमन्त्रीलाई बुझाइएको विज्ञप्तिमार्फत राष्ट्रिय सुरक्षा, शान्ति तथा स्थिरता कायम गर्न तात्कालिक र प्रभावकारी कदम चाल्न आग्रह गरेको छ।

विज्ञप्तिमा हाल विभिन्न क्षेत्रमा देखिएका अराजकता, असुरक्षा तथा समन्वय अभावका घटनाले राष्ट्रिय वातावरणमा नकारात्मक असर पारेको उल्लेख गर्दै निम्न विषयलाई प्राथमिकताका साथ कार्यान्वयन गर्न अनुरोध गरिएको छ–

१. दैनिक जीवनमा प्रत्यक्ष असर पारिरहेका अराजक गतिविधिको कडाइका साथ नियन्त्रण।
२. प्रमुख सुरक्षा निकायबीच समन्वय तथा सूचनाको द्रुत आदान–प्रदान।
३. नागरिकको दैनिकी सुरक्षित, विश्वसनीय र व्यवस्थित बनाउने कार्ययोजना तत्काल प्रभावमा ल्याउने।

यसबाहेक, समूहले दीर्घकालीन राजनीतिक स्थिरताको पूर्वशर्तका रूपमा निष्पक्ष, पारदर्शी र विश्वसनीय निर्वाचन प्रक्रियालाई द्रुत गतिमा अघि बढाउन सरकारलाई आग्रह गरेको छ। लोकतान्त्रिक मूल्य, जनविश्वास र सुशासनको आधारस्तम्भ नै निष्पक्ष निर्वाचन भएकाले सरकारले यसलाई तत्काल प्राथमिकता दिनुपर्ने विज्ञप्तिमा उल्लेख गरिएको छ।

भैरव ग्रुपका प्रतिनिधि दिभेश शाक्यद्वारा हस्ताक्षरित उक्त पत्रमा राष्ट्रको स्थिरता, नागरिक सुरक्षा र सार्वजनिक विश्वास जोगाउन सरकारले सक्दो चाँडो आवश्यक कदम चाल्ने अपेक्षा व्यक्त गरिएको छ।