नेपाल प्रहरीमा ‘कार्यसम्पादन तथा मूल्याङ्कन अभिलेख ढाँचा’ पुस १ देखि कार्यान्वयन, प्रधान कार्यालयमा अनुशिक्षण कार्यक्रम सम्पन्न

काठमाडौं, पुस १ गते । नेपाल प्रहरी प्रधान कार्यालय प्रदेश समन्वय विभागका प्रमुख प्रहरी अतिरिक्त महानिरीक्षक डम्बर बहादुर बिकको प्रमुख आतिथ्यतामा कार्यसम्पादन तथा मूल्याङ्कन ढाँचा कार्यान्वयन सम्बन्धी अनुशिक्षण कार्यक्रम सम्पन्न भएको छ।

नेपाल प्रहरीका विभिन्न इकाइहरूबाट दैनिक रूपमा सम्पादन हुने कार्यहरूलाई मार्गनिर्देशन गर्ने तथा सो अनुरूप कार्यालय र कार्यालय प्रमुखहरूको कार्य–प्रभावकारिता र कार्यदक्षता अनुगमन एवं मूल्याङ्कन गर्ने उद्देश्यले प्रहरी महानिरीक्षक दान बहादुर कार्कीको उपस्थितिमा नेपाल प्रहरी प्रधान कार्यालय नीति निर्माण समितिको मंसिर २५ गतेको बैठकबाट पारित कार्यसम्पादन र मूल्याङ्कन ढाँचा सम्बन्धमा उक्त अनुशिक्षण कार्यक्रम आयोजना गरिएको हो।

कार्यक्रममा प्रहरी अतिरिक्त महानिरीक्षक बिकले यो प्रणालीले वस्तुनिष्ठ मूल्याङ्कनको आधार तयार गर्ने र संगठनलाई आगामी दिनमा प्रभावकारी योजना बनाउन सहयोग पुग्ने बताउनुभयो। उहाँका अनुसार यस प्रणालीमार्फत विभिन्न प्रहरी इकाइहरूको तुलनात्मक अध्ययन गर्न सकिने, आफैंले गरेको कामको मूल्याङ्कन र विश्लेषण गरी सुधार गर्ने अवसर प्राप्त हुने तथा समग्रमा कार्यसम्पादनको स्तर वृद्धि हुने अपेक्षा गरिएको छ।

नेपाल प्रहरी प्रधान कार्यालय अन्वेषण योजना तथा विकास निर्देशनालयका प्रमुख प्रहरी नायव महानिरीक्षक दिपक रेग्मीले अनुशिक्षणको उद्देश्य र प्रभावकारिताबारे जानकारी गराउनुभएको थियो। यस्तै, प्रहरी नायव उपरीक्षक किरण जंग कुँवरले अनुशिक्षण कार्यक्रमको परिचय, उद्देश्य, कार्यसम्पादन अभिलेखका लागि निर्दिष्ट कार्यालयहरू, प्रतिवेदन ढाँचा, सूचकहरूको संख्यात्मक विवरण, कार्यसम्पादनका मुख्य क्षेत्र, प्रतिवेदन तथा मूल्याङ्कन प्रणाली, मूल्याङ्कन भार, उत्प्रेरणा, सुधार र अपेक्षित उपलब्धीहरूबारे विस्तृत प्रस्तुतीकरण गर्नुभएको थियो।

कार्यक्रममा प्रहरी नायव महानिरीक्षकहरू, वरिष्ठ प्रहरी अधिकृतहरूको उपस्थितिसँगै सातै प्रदेश प्रहरी कार्यालयहरू, नेपाल प्रहरी प्रदेश कार्यालयहरू, राजमार्ग सुरक्षा तथा ट्राफिक व्यवस्थापन कार्यालयहरू, प्रदेश प्रहरी तालिम केन्द्रहरू, विशेष सुरक्षा गण, प्रदेश प्रहरी गण तथा जिल्ला प्रहरी कार्यालयहरूका प्रमुख र प्रतिनिधिहरूको भर्चुअल सहभागिता रहेको थियो।

नेपाल प्रहरीका विभिन्न इकाइहरूबाट सम्पादन हुने कार्यहरूको केन्द्रीय अभिलेख प्रणाली विकास गरी ती इकाइ तथा कार्यालय प्रमुखहरूको कार्यसम्पादन तदारूकता, तत्परता, पहलकदमी र समग्र कार्यसम्पादन स्तरको वस्तुगत मूल्याङ्कन तथा मापन गर्ने उद्देश्यले ‘कार्यसम्पादन र मूल्याङ्कन अभिलेख ढाँचा’ तयार गरिएको हो। यो प्रणाली पुस १ गतेदेखि कार्यान्वयनमा आउने बताइएको छ।

विभिन्न कार्यालयका प्रमुख र कर्मचारीहरूबाट सम्पादित कार्यहरूलाई प्रभावकारी रूपमा अभिलिखित गर्ने, कार्यसम्पादनलाई वस्तुगत र परिमाणात्मक रूपमा मापन गर्ने तथा प्राप्त नतिजालाई नीतिगत सूचना र निर्णय प्रक्रियामा उपयोग गर्ने लक्ष्यसहित विकास गरिएको यस प्रणालीले प्रहरी कार्यालयहरूको आवधिक मूल्याङ्कनलाई यथार्थपरक, वस्तुनिष्ठ र समयसापेक्ष बनाउन महत्वपूर्ण भूमिका खेल्ने अपेक्षा गरिएको छ।