नेकपा एमाले केन्द्रीय लेखा आयोगको प्रथम पूर्ण बैठक सम्पन्न, आर्थिक पारदर्शिता र अनुशासनमा जोड

काठमाडौँ, पुस ४ गते । नेपाल कम्युनिष्ट पार्टी (एमाले) को केन्द्रीय लेखा आयोगको प्रथम पूर्ण बैठक पार्टीको केन्द्रीय मुख्यालय च्यासलमा सम्पन्न भएको छ। केन्द्रीय लेखा आयोगका अध्यक्ष प्रा. डा. क. पुष्प कंडेलको अध्यक्षतामा सम्पन्न बैठकमा उपाध्यक्ष क. घनेन्द्र घिमिरेसहित आयोगका केन्द्रीय सदस्यहरूको उपस्थिति रहेको थियो। बैठकको सञ्चालन सचिव क. ईश्वरीप्रसाद खरेलले गरेका थिए।

बैठकले पार्टीको लेखा, आर्थिक अनुशासन तथा व्यवस्थापनसम्बन्धी विषयमा विविध महत्वपूर्ण निर्णयहरू गरेको छ। आयोगले एमालेको ११ औँ राष्ट्रिय महाधिवेशनबाट अध्यक्ष, उपाध्यक्ष, सचिव तथा सदस्यहरूलाई निर्वाचित गर्ने सम्पूर्ण महाधिवेशन प्रतिनिधिप्रति हार्दिक आभार तथा धन्यवाद व्यक्त गरेको छ। साथै लेखा आयोगका निवर्तमान पदाधिकारी तथा सदस्यप्रति सम्मानसहित धन्यवाद ज्ञापन गरिएको छ।

पार्टीको विधान, नीति र लोकतान्त्रिक अभ्यासअनुसार सम्पन्न ऐतिहासिक महाधिवेशनले पार्टीलाई थप सुदृढ, एकताबद्ध र जिम्मेवार बनाउने विश्वास व्यक्त गर्दै आयोगले “निर्णायक राष्ट्रिय शक्ति निर्माण हाम्रो संकल्प” र “समृद्ध नेपाल, सुखी नेपाली—राष्ट्रिय गन्तव्य” भन्ने मूल नारालाई आत्मसात् गर्दै पार्टीलाई आर्थिक रूपमा पारदर्शी, अनुशासित र सुदृढ बनाउने प्रतिबद्धता जनाएको छ।

केन्द्रीय लेखा आयोगले पार्टीको आर्थिक अनुशासन, जवाफदेहिता र सुशासनलाई संस्थागत गर्दै संगठनलाई थप विश्वासिलो र बलियो बनाउने प्रमुख दायित्व निर्वाह गर्ने स्पष्ट पारेको छ। यसका लागि पार्टी नेतृत्व, निकाय तथा सम्पूर्ण पंक्तिसँग सहकार्य गर्दै अघि बढ्ने प्रतिबद्धता पनि व्यक्त गरिएको छ।

बैठकले महाधिवेशन सफल बनाउन अहोरात्र खटिएका केन्द्रीय नेतृत्व, आयोजक समिति, स्वयंसेवक, सुरक्षा निकाय, सञ्चारकर्मी तथा प्रत्यक्ष–परोक्ष रूपमा सहयोग गर्ने सम्पूर्णप्रति धन्यवाद ज्ञापन गरेको छ। साथै पार्टीको सुदृढीकरण, संगठनात्मक मजबुती तथा समाजवाद उन्मुख समृद्ध नेपालको यात्रामा निरन्तर साथ, सहयोग र मार्गदर्शनको अपेक्षा गरिएको छ।