“हिसाब मिलाउन बाँकी छ, न्याय पाउन बाँकी छ” — रिहाइपछि रवि लामिछानेको सन्देश

भैरहवा, पुस ४ गते । राष्ट्रिय स्वतन्त्र पार्टी (रास्वपा) का सभापति रवि लामिछानेले आफू अझै न्यायको लडाइँमै रहेको बताएका छन्। भैरहवास्थित जिल्ला कारागारबाट रिहा भएपछि सञ्चारकर्मीहरूसँग संक्षिप्त प्रतिक्रिया दिँदै उनले आफूले भोगेको अन्यायभन्दा देशमाथि भइरहेको अन्याय धेरै गम्भीर रहेको उल्लेख गरे।

लामिछानेले अहिले विस्तृत रूपमा बोल्ने समय नआएको जनाउँदै हिसाब–किताब गर्न अझै धेरै कुरा बाँकी रहेको बताए। “न्यायको यो लडाइँ मेरो मात्र होइन, यो देशको न्यायका लागि हो,” उनले भने, “ममाथि भएको अन्याय त केही पनि होइन, देशमाथि गरिएको अन्यायको हिसाब गर्न बाँकी छ। त्यो हिसाब मिलेपछि म अलि लामो बोल्नेछु।”

काठमाडौंबाट हवाईजहाजमार्फत भैरहवा पुग्ने तयारी भए पनि खराब मौसमका कारण उनी चितवनसम्म मात्र जहाजमा आए। त्यसपछि सडकमार्ग हुँदै साँझ पौने ६ बजे भैरहवा कारागार पुगेका लामिछाने रिहा हुँदा उनका समर्थक र पार्टीका नेता–कार्यकर्ताले कारागार परिसरमा हुटिङ गर्दै खुशियाली मनाए।

रूपन्देही जिल्ला अदालतका सूचना अधिकारी पदम अर्यालका अनुसार उच्च अदालतको आदेशअनुसार केही सर्त पूरा गरी बैंक जमानतका कागजात बुझाएपछि लामिछानेलाई रिहा गरिएको हो।

बुटवलको सुप्रिम सहकारी ठगी तथा संगठित अपराधसम्बन्धी अभियोगमा पुर्पक्षका लागि थुनामा रहेका लामिछानेलाई उच्च अदालत तुलसीपुरको बुटवल इजलासले धरौटीमा छोड्न आदेश दिएको थियो। बिगो बराबरको २ करोड ७४ लाख ८४ हजार रुपैयाँ बुझाएपछि उनी कारागारबाट बाहिरिएका हुन्।

रिहाइसँगै लामिछानेले न्यायको यात्रामा अझै संघर्ष जारी रहने स्पष्ट संकेत दिएका छन्।