नामको टुंगो नलगाउँदा मन्त्रिपरिषद् विस्तार हुन सके:कांग्रेस गुठपन्थी पक्षधर

माओवादी केन्द्रका अध्यक्ष पुष्पकमल दाहाल ‘प्रचण्ड’को नेतृत्वमा सरकार बनेको तीन महिना वित्यो । कहिले एमाले र कहिले कांग्रेससँग मिलेर दोहोरी खेलिरहेका प्रचण्डले योबीचमा सात पटक मन्त्रिपरिषद् हरेफेर गरेका छन् । पछिल्लो पटक १७ चैतमा ११ जना मन्त्री नियुक्त गरे । तर, अझै ६ मन्त्रालयले मन्त्री पाउन सकेका छैन्न् । कानुन, परराष्ट्र, युवा तथा खेलकुद र स्वास्थ्य तथा जनसंख्या, वन तथा वातावरण र खानेपानी मन्त्रालयको जिम्मेवारी प्रधानमन्त्री प्रचण्डसँग छ । ६ मध्ये चार मन्त्रालय कांग्रेसले पाउँदैछ ।

तर, कांग्रेसमा शेखर कोइराला र गगन थापा पक्षधरले नामको टुंगो नलगाउँदा मन्त्रिपरिषद् विस्तार हुन सकेको छैन । मिडियामा बोल्दा गुठ चलाउँदैन भनेर बोल्ने महामन्त्री थापा पार्टीभित्र गुठमा रमाइरहेका छन् । यो समूहबाट तीन मन्त्रालय मागेको छ । तर, सभापति शेरबहादुर देउवाले दुईवटा मन्त्रालय मात्र दिन सकिने बताइरहेका छन्, जसकारण कांग्रेसले मन्त्रीको नाम टुंगो लगाउन सकेको छैन।देउवाले संस्थापनबाट मोहन बस्नेत र एनपी साउदलाई पठाउने तयारी गरेका छन् भने शेखर समूहबाट उपसभापति धनराज गुरुङ, सहमहामन्त्रीद्वय बद्री पाण्डे, जीवन परियार र डिगबहादुर लिम्बूको नाम चर्चामा छ ।

पछिल्लो पटक सरकारका मन्त्रीहरु हाल उपनिर्वाचनको आचारसंहिता लाग्ने भएकाले अब उपचुनावपछि मात्र सरकार विस्तार हुने बताइरहेका थिए । तर, निर्वाचन आयोगले भने उपनिर्वाचन हुने बारा, चितवन र तनहुँमा मात्र आचारसंहिता लाग्ने बताइसकेको छ । त्यसकारण अब सत्ता गठबन्धनलाई बाहना मिलेको छैन । । निर्वाचन आयोगले वैशाख १० गते बारा–२, चितवन–२ र तनहुँ–१ मा प्रतिनिधिसभा सदस्यका लागि हुने उपनिर्वाचनका लागि शुक्रबारदेखि निर्वाचन आचारसंहिता लागू गर्ने निर्णय गरिसकेको छ । उपनिर्वाचनका लागि जारी भएको आचारसंहिताकै कारण मन्त्रिपरिषद् विस्तार, प्रदेशका सरकारहरू निर्माण र विस्तार लगायतका गतिविधि प्रभावित नहुने आयोगले जनाएको छ