जेन जि मुभमेन्ट नेपाल: सर्वपक्षीय सरकारको पक्षमा, संघर्ष केवल सत्ता परिवर्तनका लागि होइन

काठमाडौँ, पुस ११ गते । जेन जि विद्रोहले उठाएका राजनीतिक तथा सामाजिक माग अझै सम्बोधन नभएको भन्दै जेन जि मुभमेन्ट नेपालले वर्तमान निर्वाचन प्रक्रिया देश र जनताको हित विपरीत हुने चेतावनी दिएको छ। मुभमेन्टका अनुसार समस्याको मूलकारण नछोइ जबरजस्ती चुनावतर्फ अघि बढ्नु सामाजिक द्वन्द्वलाई गहिर्याउने र गृह युद्धको जोखिम निम्त्याउने कदम हो।

आज जारी प्रेस वक्तव्यमा, २०८२ भाद्र २३–२४ गते नवोदित पुस्ताले गरेको जेन जि विद्रोहलाई मुभमेन्टले “गहिरो राजनीतिक जागरण”को रूपमा व्याख्या गर्दै, त्यसबाट उठेका माग र चेतनालाई संविधानमै समावेश नगरेसम्म संघर्ष जारी रहने स्पष्ट पारेको छ।

प्रवक्ता विजय शाहले वर्तमान सरकारले नैतिक र राजनीतिक वैधता गुमाइसकेको उल्लेख गर्दै तत्काल सत्ता छोड्नुपर्नेमा जोड दिएका छन्। त्यसैगरी, देशलाई विद्यमान संवैधानिक र राजनीतिक संकटबाट मुक्त गर्न सर्वपक्षीय सरकार निर्माण गरिनु आवश्यक रहेको बताए।

शाहका अनुसार, जेन जि मुभमेन्ट नेपालको उद्देश्य केवल सत्ता परिवर्तन होइन, तर राज्यको चरित्रमै परिवर्तन ल्याउनु हो। त्यसैले सर्वपक्षीय सहमतिमा आधारित सरकार निर्माणको प्रस्तावलाई सकारात्मक रूपमा लिएर जेन जि मुभमेन्ट नेपाल कुनै पनि दल, समूह वा व्यक्तिसँग सहकार्य गर्न तयार छ।

यसैबीच, माओवादी अध्यक्ष नेत्रविक्रम चन्दले पनि सर्वपक्षीय सरकार आवश्यक रहेको अडान लिएर यस प्रक्रियामा दबाब दिन थालेका छन्। मुभमेन्टका अनुसार, यो कदमले जेन जि विद्रोहका मुद्दाहरू पूरा गर्ने दिशामा सकारात्मक भूमिका खेल्न सक्छ।