राष्ट्रिय स्वतन्त्र पार्टी र उज्यालो नेपाल पार्टीबीच एकता, नयाँ राजनीतिक शक्तिको औपचारिक घोषणा

काठमाडौँ, पुस १४ गते । राष्ट्रिय स्वतन्त्र पार्टी र उज्यालो नेपाल पार्टीबीच एकतासम्बन्धी सहमतिपत्रमा हस्ताक्षर भएको छ। मुलुकको परिवर्तित राजनीतिक घटनाक्रमले सिर्जना गरेको विशिष्ट परिस्थितिलाई मनन गर्दै समतामूलक विकास, सामाजिक न्याय र सुशासनसहितको उदार अर्थतन्त्र निर्माण गर्ने साझा उद्देश्यका साथ दुवै दल एकतामा पुगेका हुन्।

सहमति अनुसार भ्रष्टाचार र कुशासनविरुद्ध नव–युवाहरू (जेन जि) ले अघि सारेको आन्दोलनको मर्मलाई आत्मसात गर्दै लोकतान्त्रिक बहुलवादी प्रणालीभित्र असल शासन स्थापना गर्ने प्रतिबद्धता जनाइएको छ। २०८२ साल भदौ २३ र २४ गतेको आन्दोलनसहित विभिन्न कालखण्डका जनआन्दोलन तथा घाइतेहरूको बलिदानलाई प्रेरणाको स्रोतका रूपमा स्मरण गर्दै आगामी १० वर्षभित्र नेपाललाई सम्मानजनक मध्यम आय भएको राष्ट्र बनाउने लक्ष्य तय गरिएको छ।

एकता पश्चात गठित राजनीतिक दलको नाम राष्ट्रिय स्वतन्त्र पार्टी नै रहनेछ। दलको झण्डा निलो पृष्ठभूमिमा सेतो गोलाकारभित्र निलो घन्टी रहनेछ भने चुनाव चिन्ह पनि घन्टी नै रहनेछ। पार्टीको केन्द्रीय कार्यालय काठमाडौँ उपत्यकामा रहने सहमति भएको छ।

सहमति अनुसार पार्टीको केन्द्रीय सभापतिमा रवि लामिछाने रहनेछन्। उपसभापतिमा कुलमान घिसिङ, डिपी अर्याल र स्वर्णिम वाग्ले रहने व्यवस्था गरिएको छ। यस एकतासँग सम्बन्धित सबै दस्तावेज निर्वाचन आयोगमा अध्यावधिक गरिनेछ।

साथै, लोकतान्त्रिक सुशासन, समुन्नति र सामाजिक न्यायका मुद्दा अघि बढाउन अन्य परिवर्तनकामी तथा वैकल्पिक राजनीतिक शक्ति, समूह र व्यक्तिहरूलाई समेत एकतामा गोलाबद्ध हुन आह्वान गरिएको छ।

सहमति पत्रमा राष्ट्रिय स्वतन्त्र पार्टीका सभापति रवि लामिछाने र उज्यालो नेपाल पार्टीका तर्फबाट अनुपम कुमारले हस्ताक्षर गरेका छन् भने काठमाडौँ महानगरपालिकाका प्रमुख बालेन्द्र शाह साक्षीका रूपमा रहेका छन्।