पत्रकारको सुरक्षालाई प्राथमिकता दिनुपर्छ: सामाजिक सुरक्षा कोषमा सबै पत्रकार जोड्ने सरकारको प्रतिबद्धता

चितवन, पुस १९ गते । सञ्चार तथा सूचना प्रविधिमन्त्री जगदीश खरेलले देशभर कार्यरत पत्रकारलाई सामाजिक सुरक्षा कोषमा आबद्ध गर्नु अनिवार्य भएको बताएका छन्। नेपाल पत्रकार महासङ्घ चितवन शाखाको निरीक्षणपछि सञ्चारकर्मीसँग कुरा गर्दै उनले पत्रकारको पेशागत सुरक्षा र स्थायित्व सरकारको प्राथमिकतामा रहेको स्पष्ट पारे।

मन्त्री खरेलका अनुसार सरकारले हाल सरकारी सञ्चारमाध्यममा कार्यरत पत्रकारलाई सामाजिक सुरक्षा कोषमा समेट्ने प्रक्रिया सुरु गरिसकेको छ। “यसलाई क्रमशः सबै पत्रकारसम्म विस्तार गर्न आवश्यक छ,” उनले भने। पत्रकार महासङ्घको कार्यालयमा प्रवेश गर्दा आफ्नै घरमा आएको अनुभूति हुने उल्लेख गर्दै उनले चितवन शाखा अन्य शाखाको तुलनामा व्यवस्थित र सक्रिय रहेको प्रशंसा गरे।

उनले पत्रकारका दीर्घकालीन समस्या समाधानका लागि वर्तमान सरकारले केही आधारशिला तयार गरिरहेको दाबीसमेत गरे। लोककल्याणकारी विज्ञापनको वितरण प्रणाली पारदर्शी र न्यायोचित हुनुपर्नेमा जोड दिँदै मन्त्री खरेलले सबै सञ्चारमाध्यमले समान अवसर पाउनुपर्ने बताए।

निरीक्षणका क्रममा नेपाल पत्रकार महासङ्घ चितवन शाखाका अध्यक्ष वसन्त पराजुलीले जिल्लामा पत्रकारिताको अवस्था, चुनौती र आवश्यक सुधारबारे मन्त्रीलाई जानकारी गराएका थिए। सोही अवसरमा मन्त्री खरेलले समाचार सङ्कलनका क्रममा दुर्घटनामा परेका नेपाल टेलिभिजन चितवनका समाचारदाता अनिल ढकालको स्वास्थ्य अवस्थाबारे जानकारी लिँदै भेटसमेत गरे।

मन्त्री खरेलले ढकाललाई नेपाल टेलिभिजनमा निरन्तर रूपमा काम गर्न सक्ने वातावरण बनाइने प्रतिबद्धता जनाए। यसका लागि सार्वजनिक सेवा प्रसारण नेपालका कार्यकारी अध्यक्ष महेन्द्र विष्टलाई टेलिफोनमार्फत आवश्यक सहजीकरण गर्न निर्देशनसमेत दिएका थिए।

ढकालले प्रत्यक्ष प्रसारणका लागि जाँदा दुर्घटना भएको उल्लेख गर्दै नेपाल टेलिभिजनमा स्थायित्वसहित रोजगारी सुनिश्चित गरिदिन आग्रह गरेका थिए। गत असोजमा मुग्लिन–नारायणगढ सडकखण्डमा समाचार सङ्कलनका क्रममा दुर्घटनामा परेका ढकालको स्वास्थ्य अवस्था क्रमशः सुधारोन्मुख रहेको बताइएको छ। उनी पछिल्ला तीन महिनादेखि उपचाररत छन्।