ट्राफिक प्रहरी घाइते बनाइ फरार चालक चितवनबाट पक्राउ

हेटौंडा, पुस १९ गते । डिउटीमा खटिएका ट्राफिक प्रहरीलाई घाइते बनाएर फरार भएका कार चालकलाई प्रहरीले चितवनबाट पक्राउ गरेको छ।

पुस १७ गते साँझ करिब ७:४५ बजे हेटौंडा उपमहानगरपालिका–११ थानाभर्‍याङस्थित जिल्ला ट्राफिक प्रहरी कार्यालय मकवानपुरको टोलीले सवारी चेकजाँच गरिरहेको थियो। सोही क्रममा नवलपुरबाट हेटौंडातर्फ आउँदै गरेको एक कारलाई प्रहरीले रोकेको थियो।

ब्रेतलाइजर मेसिनमार्फत मादक पदार्थ सेवन (मा.प.से.) परीक्षण गर्ने क्रममा चालकले अचानक कारको सिसा बन्द गरी गाडी अघि बढाए। यस क्रममा डिउटीमा खटिएका एक प्रहरी जवान करिब १० मिटर घिस्रिँदै घाइते भएका थिए। घटनापछि चालक कारसहित फरार भएका थिए।

घटनापछि खोजी कार्यलाई तीव्र बनाएको प्रहरीले फरार चालकलाई चितवनबाट नियन्त्रणमा लिएको जनाएको छ। घाइते प्रहरीको उपचार भइरहेको छ भने पक्राउ परेका चालकविरुद्ध आवश्यक कानुनी प्रक्रिया अघि बढाइएको प्रहरीले जानकारी दिएको छ।