भीमफेदी–कुलेखानी सडकमा सुमो खस्यो, ६ जनाको ज्यान गयो

भीमफेदी, पुस २० गते । मकवानपुरको भीमफेदी गाउँपालिका–६ जुरिखेतमा भएको सुमो दुर्घटनाले ठूलो मानवीय क्षति पुर्‍याएको छ। दुर्घटनामा घाइते भएका ९ जनामध्ये उपचारका क्रममा ६ जनाको मृत्यु भएको जिल्ला प्रहरी कार्यालय मकवानपुरले पुष्टि गरेको छ।

आइतबार साँझ करिब ५ः३० बजे भीमफेदी–कुलेखानी–काठमाडौं सडकखण्डमा काठमाडौंबाट हेटौंडातर्फ जाँदै गरेको ना.१ज १७७८ नम्बरको सुमो गाडी अनियन्त्रित भई सडकबाट करिब १०० मिटर तल खोल्सामा खस्दा दुर्घटना भएको हो।

दुर्घटनापछि स्थानीय बासिन्दा, प्रहरी तथा उद्धार टोलीले घाइतेहरूको तत्काल उद्धार गरी उपचारका लागि अस्पताल पुर्‍याएका थिए। तर गम्भीर घाइतेमध्ये ६ जनाले उपचारकै क्रममा ज्यान गुमाएका हुन्। बाँकी घाइतेहरूको अवस्था र उपचारबारे थप विवरण आउन बाँकी रहेको प्रहरीले जनाएको छ।

दुर्घटनाको कारणबारे अनुसन्धान भइरहेको र आवश्यक कानुनी प्रक्रिया अघि बढाइएको जिल्ला प्रहरी कार्यालय मकवानपुरले जानकारी दिएको छ।