निर्वाचन सुरक्षाका लागि १ लाख ३३ हजारभन्दा बढी म्यादी प्रहरी भर्ना प्रक्रिया सुरु

काठमाडौं, पुस २४ गते । आगामी प्रतिनिधि सभा निर्वाचनलाई शान्तिपूर्ण, सुरक्षित र व्यवस्थित बनाउन नेपाल प्रहरीले ठुलो सङ्ख्यामा म्यादी प्रहरी भर्ना गर्ने प्रक्रिया अघि बढाएको छ। प्रहरी प्रधान कार्यालय, मानवस्रोत विकास विभागका अनुसार देशभरबाट कुल १ लाख ३३ हजार ९८० जनाका लागि दरखास्त आह्वान गरिएको हो।

इच्छुक नेपाली नागरिकहरूले पुस २५ गतेदेखि माघ १ गतेसम्म आवेदन दिन सक्नेछन्। सार्वजनिक बिदाका दिनसमेत बिहान १० बजेदेखि साँझ ५ बजेसम्म फाराम बुझाउने व्यवस्था गरिएको छ। दरखास्तहरू सबै जिल्ला प्रहरी कार्यालय तथा काठमाडौँ, ललितपुर र भक्तपुरका जिल्ला प्रहरी परिसरबाट सङ्कलन गरिनेछ।

भर्नाका लागि उम्मेदवार १८ वर्ष पूरा भई ५४ वर्ष ननाघेको, सामान्य लेखपढ गर्न सक्ने, कुनै फौजदारी अभियोगमा सजाय नपाएको तथा कुनै राजनीतिक दलको सदस्य नरहेको हुनुपर्नेछ। साथै शारीरिक र मानसिक रूपमा स्वस्थ हुनु अनिवार्य रहेको प्रहरीले जनाएको छ।

म्यादी प्रहरीको कार्य अवधि नियुक्ति मितिदेखि ४० दिन रहनेछ। यस अवधिमा उनीहरूले नेपाल प्रहरीको जवान सरहको सुरु तलब स्केलअनुसार पारिश्रमिक पाउनेछन्। साथै रासन (खाना) खर्च, खाजा खर्च र ड्युटीका क्रममा आउजाउका लागि एकपटकको विशेष तयारी खर्च समेत उपलब्ध गराइनेछ।

दरखास्त दिएका उम्मेदवारहरूको छनोट माघ १४ गते सम्बन्धित प्रहरी कार्यालयहरूमा सञ्चालन हुनेछ। अन्तिम नतिजा माघ १७ गते सार्वजनिक गरिने र सफल उम्मेदवारहरूको प्रशिक्षण माघ १८ गतेदेखि सुरु हुने जानकारी दिइएको छ।