पृथ्वी जयन्तीमा काठमाडौँमा एकताको भव्य झलक, भद्रकालीदेखि सिंहदरबारसम्म परेड

काठमाडौँ, पुस २६ गते । काठमाडौँ । पृथ्वी जयन्ती तथा राष्ट्रिय एकता दिवसको अवसरमा काठमाडौँमा भव्य एकता परेड आयोजना हुने भएको छ। पौष २७ गते बिहान ११ बजे भद्रकालीबाट सुरु भई सिंहदरबारसम्म पुग्ने उक्त परेडले राष्ट्रिय एकताको सशक्त सन्देश प्रवाह गर्ने आयोजकको विश्वास छ।

राष्ट्रिय ऐक्यबद्धतालाई केन्द्रमा राखेर आयोजना गरिने परेडमा हजारौँ नेपालीहरूको स्वस्फूर्त सहभागिता रहने अपेक्षा गरिएको छ। सहभागी हुन कुनै औपचारिक प्रक्रिया आवश्यक नपर्ने बताउँदै आयोजकले सबैलाई स्वतःस्फूर्त रूपमा उपस्थित हुन आह्वान गरेका छन्।

परेडमा सहभागीहरूले आ–आफ्नो भेषभूषा, संस्कृति र पहिचान झल्किने प्रस्तुति दिन आग्रह गरिएको छ। विविध जाति, भाषा र संस्कृतिको प्रतिनिधित्व मार्फत नेपाली समाजको बहु-सांस्कृतिक स्वरूप र एकताको भावना उजागर गर्ने लक्ष्य लिइएको छ।

पृथ्वी जयन्ती तथा राष्ट्रिय एकता दिवसलाई उत्सवका रूपमा मनाउने क्रममा काठमाडौँ सहित देशभर विभिन्न कार्यक्रमहरू सञ्चालन हुनेछन्। यस अवसरमा सांस्कृतिक कार्यक्रम, दिव्यो पदेश वितरण तथा वाचन, साथै अन्य रचनात्मक गतिविधिहरू आयोजना गरिने जनाइएको छ।
पृथ्वी नारायण शाहले निर्माण गरेको एकीकृत नेपालको भावना, राष्ट्रिय स्वाभिमान र बलिदानको सम्मानलाई केन्द्रमा राखेर परेड आयोजना गरिएको हो। यसले नयाँ पुस्तामा राष्ट्रिय चेतना अभिवृद्धि गर्नुका साथै इतिहास प्रतिको सम्मान र भविष्य प्रतिको जिम्मेवारीको सन्देश दिने अपेक्षा गरिएको छ।

एकता परेडको स्वयंसेवक व्यवस्थापनमा जेन जि मुभमेन्ट नेपाल सक्रिय रहनेछ। प्रवक्ता विजय शाहका अनुसार पौष २७ गते नेपालको सबैभन्दा महत्वपूर्ण दिन हो। “हामी विभिन्न दल, समूह वा समुदायका नाममा विभाजित भए पनि आजको आवश्यकता भनेको सबै एक ठाउँमा उभिएर एकताको सन्देश दिनु हो,” उनले बताए।