राष्ट्रिय स्वतन्त्र पार्टी: नयाँ आशा कि योजनाबद्ध राजनीतिक प्रयोग? — बुद्धछिरिङ मोक्तान

काठमाडौँ, फागुन १२ गते । राजनीतिक विश्लेषक बुद्धछिरिङ मोक्तानले राष्ट्रिय राजनीति र वैचारिक दिशाबारे गम्भीर प्रश्न उठाएका छन्। सामाजिक सञ्जाल फेसबुक मार्फत सार्वजनिक गरेको आफ्नो स्टाटसमा उनले राष्ट्रिय स्वतन्त्र पार्टीलाई केवल “नयाँ आशा”को नाममा प्रस्तुत गरिएको राजनीतिक प्रयोग हो कि योजना बद्ध राजनीतिक घोटाला (Scam) हो भन्ने प्रश्न उठाएका हुन्।

मोक्तानले इतिहासले देखाइसकेको उदाहरण उल्लेख गर्दै “समाजवाद” भन्ने आदर्श व्यवहारमा धेरै ठाउँमा सत्ताकेन्द्रित संरचना र राजनीतिक घोटालामा रूपान्तरण भएको तर्क गरेका छन्। उनका अनुसार मार्क्सवाद, लेनिनवाद र माओवादजस्ता विचारधाराका प्रयोगहरू अन्ततः सत्ता केन्द्रित व्यवस्थामै सीमित हुन पुगे।

उनले अर्कोतर्फ ऐतिहासिक र सभ्यतागत राज्यदृष्टिका विकल्पहरूमध्ये उदारवाद सापेक्ष रूपमा सफल राज्यदृष्टि सावित भएको उल्लेख गर्दै नेपालको सन्दर्भमा नेपाली काँग्रेसलाई उदारवादी परम्पराको संवाहकका रूपमा लिइँदै आएको स्मरण गराएका छन्। तर विश्वव्यापी रूपमा उदार राज्यदृष्टि स्वयं संकटमा परेको वर्तमान अवस्थामा नेपाली काँग्रेससमेत वैचारिक र राजनीतिक रूपमा स्पष्ट दिशाहीन देखिन थालेको उनको टिप्पणी छ।

मोक्तानले नेपाललाई दीर्घकालीन मार्ग देखाउन केवल नयाँ पार्टी वा पुराना नाराहरू पर्याप्त नहुने उल्लेख गर्दै स्पष्ट वैचारिक आधार र सभ्यतागत राज्यदृष्टिको आवश्यकता औँल्याएका छन्। उनको भनाइमा, राजनीतिक परिवर्तनको नाममा गरिने सतही प्रयोगभन्दा गहिरो वैचारिक बहस र स्पष्ट दिशानिर्देश आजको सबैभन्दा ठूलो आवश्यकता हो।