राजनैतिक संस्कारले संकट मोडियो : गृहमन्त्री ओम प्रकाश अर्यालको नेतृत्वमा छ महिनामै देश स्थायित्वतर्फ

काठमाडौँ, फागुन २० गते । राजनीति र राजनैतिक संस्कार फरक कुरा भएको सन्देश पछिल्लो छ महिनामा स्पष्ट रूपमा देखिएको छ। देशले अभूतपूर्व राजनीतिक, सामाजिक र सुरक्षा संकट झेलिरहेको बेला गृहमन्त्री ओम प्रकाश अर्यालको संयमित, कानुन सम्मत र दूरदर्शी नेतृत्वले देशलाई गम्भीर दुर्घटनाबाट जोगाउन सफल भएको विश्लेषण गरिएको छ।

छ महिनाअघि देशभर विद्रोह, ध्वंश, आक्रोश र अराजकताले शान्तिसुरक्षा लगभग शून्य अवस्थामा पुगेको थियो। प्रहरी संरचना ध्वस्त, मनोबल कमजोर, सरकारी कार्यालय खरानी, न कागजात न डेटा—देश दिशाहीन अवस्थामा थियो। यस्तो कठिन परिस्थितिमा समयमै निर्वाचन सम्पन्न हुन्छ भन्ने विश्वास कमैलाई थियो।

तर सीमित स्रोत, असीमित अपेक्षा र तीव्र दबाबका बीच पनि गृहमन्त्री अर्यालले न हिरोगिरी देखाए, न तुष्टीकरणको बाटो रोजे। अन्तर्राष्ट्रिय तथा राष्ट्रिय कानुनको सम्मान गर्दै, प्रधानमन्त्री सुशीला कार्कीलाई अन्तिम सम्म साथ दिँदै तोकिएकै समयमा निर्वाचन तर्फ देशलाई डोर्‍याउन उनी सफल भए।

आज जनजीवन क्रमशः सामान्य तर्फ फर्कँदै छ। शान्तिसुरक्षा र प्रहरी मनोबलमा उल्लेख्य सुधार आएको छ। सबै संरचना पूर्ण रूपमा उभिन नसके पनि आम नागरिकको आत्मबल र आशा पुनःस्थापित भएको छ। संकट व्यवस्थापनमा देखिएको यो अभ्यास धेरै देशका लागि उदाहरणीय बन्न सक्ने विश्लेषकहरूको भनाइ छ।

राजनीतिक पदबाट अलग भएर पुरानै पेशामा फर्किने अर्यालको निर्णयले राजनीतिक संस्कारको अर्को उदाहरण प्रस्तुत गरेको छ। आगामी सरकारले उनलाई सल्लाहकारका रूपमा उपयोग गरे थप लाभदायक हुने अपेक्षा पनि व्यक्त गरिएको छ।